Байланыс саласының үздік маманы мемлекеттік наградамен марапатталды

 Қостанайдағы "Қазақтелеком" АҚ инсталляциялық жұмыстар департаментінің инсталляторы Мәди Таскенов — осы саланың шебері. Өмірінің 10 жылын телекоммуникация саласына арнаған ол Республика күніне орай адал еңбегі мен өңірдің телекоммуникация саласын дамытуға қосқан үлесі үшін "Ерен еңбегі үшін" медалімен марапатталды, — деп хабарлайды Aikyn.kz.

Оның айтуынша, ол осы күнге дейін 19 мыңнан астам клиентті интернетке қосып, қаладағы "Юбилейный" және "Кунай" шағын аудандарын байланысқа шығарған. Өзі үшін бұл жай ғана жұмыс емес, халықтың байланыста болуына атсалысу деп сенеді.

— Менің әке-шешем байланыс саласында жұмыс істеді. «Бала естігенін емес, көргенін істейді» демекші, мен де олардың ізімен келемін. Әрине, жұмысымыз қайнап жатады, бір тыным таппаймыз. Бірақ жұмыс сонысымен қызық, өзіме қатты ұнайды, , — дейді Мәди.

Айтуынша, оның бір күндік кестесі әр үйдің байланысын орнатып, анықтаудан дамыл таппайды.

—  Жұмысқа келісімен арнайы жасақталған киімді киіп алып, қандайда бір кедергіге тап болған клиенттерге байланысып, көрсеткен мекенжайына барып, интернеттің дұрыс істеуін қадағалап, жөндеп береміз орнатамыз. Өзімізбен бірге Fujikura 60s-86s+ және Viavi MTS-4000 рефлектометрі  секілді дәнекерлеу құралын алып жүреміз. Міне, сол арқылы 500 Мбит/с дейінгі жылдамдықпен жаңа буын интернетін қосамыз, — деді Мәди Таскенов.

Осындай үздіксіз жүмыстың арқасында Қостанай қаласының тұрғындары тұрақты әрі жылдам интернетке қол жеткізіп қана қоймай, өздерінің өмір сүру дағдысын жақсарта түсті.

Мәди өзі қатардағы қызметкер болғанымен қаланың телекоммуникациясының қарқынды дамуына қосқан үлесі зор. Ал әріптестері болса оны бір ауыздан өз ісін білетін білікті маман санайды.