Байқау жеңімпаздарын марапаттады

Шешуші кезеңге еліміздің әр өңірінде өткен аймақтық турлардың жеңімпаздары қатысты. Парламент Сенатының Төрағасы Мәулен Әшімбаев үздік шыққан отбасыларды құттықтап, лауреаттарды марапаттады.

Алдымен Мәулен Әшімбаев қатысушыларға ілтипат білдіріп, байқаудың Республика күнімен тұспа-тұс келгеніне назар аударды. Ол биыл Егемендік туралы декларацияның қабылданғанына 35 жыл толып отырғанын айтып, дәстүрлі бірегей конкурстың осындай мерейлі дата қарсаңында өткізілуі символикалық мәнге ие екенін тілге тиек етті. Сондай-ақ палата Спикері «Мерейлі отбасы» жобасы ұрпақтар сабақтастығын сақтауға және ұлттық құндылықтарды дәріптеуге ықпал ететінін атап өтті.

Сенат Төрағасы өз сөзінде ұлтымыздың жаңа сапасын қалыптастыруда отбасы институты маңызды рөл атқаратынына және бұл мәселе Мемлекет бас­шысының үнемі басты назарында екеніне де тоқталды. 

– Қазақ – қашанда отбасын қасиетті ұғым санаған халық. Отбасының беріктігі мен ынтымағы – ұлттың бірлігі мен тұрақтылығының кепілі. Сондықтан ата-ананы ардақтау, туыстық қатынастарды нығайту сияқты құндылықтар ұлт мәдениетінің өзегіне айналды. Қазіргі таңда Президентіміз Қасым-Жомарт Кемелұлы Тоқаевтың тапсырмасымен осы сабақтастықты әрі қарай сақтау үшін ауқымды жұмыс атқарылып келеді. Бұл ретте отбасы институтын нығайтуға, ана мен баланы қорғауға және қоғамда дұрыс құндылықтар жүйесін насихаттауға баса мән беріліп отыр. Мемлекет басшысы биылғы Жолдауында да отбасыларды қолдауға, ана мен баланың құқықтарын қорғауға арналған маңызды міндеттер жүктеді. Бұл әлеуметтік бас­тама­лардың бәрі елімізде отбасы құндылықтарының ны­ғаюына және азаматтардың өмір сүру сапасын жақсартуға ықпал етеді деп сенеміз, – деді Мәулен Әшімбаев.

Сонымен қатар Сенат Төрағасы Мемлекет басшысының тапсырмаларын орындау аясындағы Парламенттің заң шығару қызметі жөнінде айтты. Бұл ретте «Ұлттық қор – балаларға», «Келешек мектептері» сияқты кешенді жобалар және білім беру процесіне цифрлық технологияларды енгізу жолындағы іргелі істер туралы сөз болды.

Мәулен Әшімбаев «Мерейлі отбасы» байқауының жеңімпаздарын құттықтай келе, қатысушыларға азаматтық жауапкершіліктің озық үлгісін көрсетіп, адамгершілік және отбасылық құндылықтарды дә­ріптеуге үлкен үлес қосқаны үшін ризашылық білдірді.

«Мерейлі отбасы–2025» байқауында 20 отбасы жеңімпаз атанды. Олардың қатарында Ақмола облысынан келген шығармашылық отбасы – Мекебаевтар, Алматы облысынан келген қолөнершілер әулеті – Бекдайырлар, Ақтөбе облысынан келген Төремұратовтар, Абай облысынан Сыдықбаевтар бар. Республикалық маңызы бар Астана, Алматы және Шымкент қалаларының жеңімпаздары – Айтқожиндер, Дүйсебаевтар және Нұртаевтар отбасылары. Ал Батыс Қазақстан облысынан Сүйінғаровтар отбасы үздік деп танылды. Қарағанды облысының үлгілі отбасы болып кеншілер әулеті – Ключниковтар атанды. Солтүстік Қазақстаннан механизаторлар отбасы – Өзбековтер, Атырау облысынан теміржолшылар отбасы – Өтеповтер, Қостанайдан жұмысшылар отбасы – Егембердиевтер, Жамбылдан теміржолшылар әулеті Бектасовтар жеңімпаз деп танылды. 

Сонымен бірге, Жетісу облысынан мәдени және спорттық мұраны насихаттауға үлес қосып жүрген Бектеновтер отбасы, Павлодар облысынан шахтерлер әулеті – Тұрсынбаевтар, Ұлытау облысынан аграршылар отбасы – Қапбасовтар, Қызылорда облысынан еңбек сіңірген жұмысшылар отбасы – Әбсадықовтар, Маңғыстау облысынан қоғам қайраткерлері және шаруалар әулеті – Шолтамановтар, Түркістан облысынан агрономдар отбасы – Молдабековтер және Шығыс Қазақстан облысынан ғұмыр жолын табиғатты қорғауға арнаған Жақыповтар отбасы үздік шықты.