Баку Тбилиси Карс теміржолы ашылды

АСТАНА, 3 маусым – Sputnik. Грузиядағы Ахалкалаки теміржол станциясында Баку-Тбилиси-Карс (БТК) теміржолының ресми ашылу салтанаты өтті, оған Қазақстанның көлік вице-министрі Жәнібек Тайжанов қатысты, деп хабарлады министрліктің баспасөз қызметі.

Баку–Тбилиси–Карс теміржолы – Транскаспий халықаралық көлік бағытының (ТХКБ) маңызды бөліктерінің бірі.

"Бағыт Әзербайжан, Грузия және Түркия теміржол желілері арасындағы көлік байланысын қамтамасыз етіп, Қазақстаннан жүктерді Каспий теңізі арқылы Түркияға және Еуропа елдеріне тасымалдауға қосымша мүмкіндік ашады", - деп жазылған хабарламада.

Теміржол магистралінің жалпы ұзындығы 827 шақырымды құрайды.

Желі 2017 жылдан бастап сынақ режимінде жұмыс істеп келеді. 2023 жылдың мамыры мен 2024 жылдың мамыры аралығында учаскеде ауқымды инфрақұрылымды жаңғырту жұмыстары жүргізілді, бұл маршруттың өткізу қабілетін айтарлықтай арттырды.

Қайта құрудан кейін Баку-Тбилиси-Карс темір жолының жылдық өткізу қабілеті 1 миллион тоннадан 5 миллион тоннаға дейін артты.