Бала жарақат алып, тістерін зақымдағаны үшін балабақша өтемақы төлейді

АСТАНА, 5 желтоқсан - Sputnik. Сот балабақшаны баланың жарақат алғаны үшін өтемақы төлеуге міндеттеді, деп хабарлады Қарағанды облыстық сотының баспасөз қызметі.

Шахтинск қалалық соты 2019 жылы туған кәмелетке толмаған балаға балабақша тарапынан келтірілген материалдық залалды және моральдық зиянды өндіру туралы талап арыз бойынша азаматтық істі қарады.

Сотта анықталғандай, 2025 жылдың мамыр айында балабақша аумағында бала бет жарақатын алып, оның салдарынан алдыңғы тістері зақымданған.

Сот-медициналық сараптама қорытындысына сәйкес, бұл жарақат денсаулыққа орташа ауырлықтағы зиян келтірген.

Талапкер 46 285 теңге материалдық шығынды, 1 500 000 теңге моральдық зиянды, сондай-ақ сот шығындарын өндіруді сұрады.

Жауапкер жазатайым оқиғаны тергеу актісіне сілтеме жасай отырып, жарақат бала тарапынан болған аңғарсыздық нәтижесінде болғанын айтып, моральдық шығын үшін 100 000 теңге және материалдық шығын үшін 22 285 теңге талап арызды ішінара мойындады.

"Сот шешімімен талап ішінара қанағаттандырылды. Жауапкерден 500 000 теңге моральдық зиян үшін өтемақы, 32 285 теңге материалдық шығын, сондай-ақ өкілдің қызметіне және мемлекеттік бажға төленген шығындар өндірілді", - деп жазылған хабарламада.

Талапты ішінара қанағаттандыра отырып, сот баланың денсаулығына келтірілген зиян балабақша әкімшілігінің кінәсінен болғанын атап өтті, себебі тәрбиешілер кәмелетке толмаған балаларға тиісті бақылау жасауы тиіс. Сот сондай-ақ баланың тіс жағдайына байланысты жарақаттың болашақтағы ықтимал салдары жөніндегі талапкердің уәждерін ескерді.

Сот актісі заңды күшіне енген жоқ.