Ресей Ақтау маңындағы әуе апаты бойынша Әзербайжанға өтемақы төлейді

Ресей билігі Ақтау маңында құлаған Әзербайжанның AZAL әуе компаниясы ұшағына қатысты барлық келісімді орындайтынын мәлімдеді.
Ресей Сыртқы істер министрінің орынбасары Михаил Галузиннің айтуынша, Мәскеу тергеуді аяқтауға асықпайды және Баку мен Астанамен бірлескен жұмыстарды жалғастырады.

Галузин Ресей 9 қазанда Душанбеде Владимир Путин мен Ильхам Алиев арасында қол жеткізілген уағдаластықтарды толық орындайтынын атап өтті. Оның ішінде зардап шеккендер мен қаза тапқандардың отбасына өтемақы төлеу міндеттемесі бар.
Айта кетейік, 2024 жылдың 25 желтоқсанында Баку – Грозный бағытындағы AZAL ұшағы Ақтау маңында апатқа ұшыраған. Бортта 67 адам болған, оның 38-і қаза тапты. Құрбандардың арасында Әзербайжан, Ресей, Қазақстан және Қырғызстан азаматтары бар.