Дәрігер қазақстандықтан қатерлі ісікті байқамай қалған аурухана өтемақы төлейді

Батыс Қазақстан облысының соты онкологиялық ауруы дер кезінде анықталмауы салдарынан қайтыс болған пациенттің отбасы берген талап арызды ішінара қанағаттандырды, деп хабарлайды Tengri Health соттың баспасөз қызметіне сілтеме жасап.

Ер адам 2023 жылдың желтоқсанынан 2024 жылдың 15 тамызына дейін Бәйтерек ауданының екінші ауруханасында емделген.

Ол қайтыс болғаннан кейін жұбайы мен баласы сотқа жүгінген. Олар медициналық мекемеден моральдық шығын ретінде әрқайсысына 10 миллион теңгеден өтемақы өндіруді талап етті.

Талап қоюшылардың айтуынша, емдеу кезінде пациентке медициналық көмек тиісті деңгейде көрсетілмеген. Талап арызда отағасы мен әкенің қазасы отбасы үшін ауыр психологиялық соққы болғаны көрсетілген.

Қандай заңбұзушылықтар анықталды?

Сот анықтағандай, жалпы практикадағы дәрігер медициналық көмек көрсету кезінде бірқатар кемшіліктерге жол берген.

Атап айтқанда, медицина қызметкері:

зертханалық зерттеулердің нәтижелерін тиісті деңгейде түсіндірмеген; Денсаулық сақтау министрлігінің диагностикалау және емдеу хаттамаларының ұсынымдарын сақтамаған; пациентті дер кезінде бейінді мамандарға, соның ішінде гастроэнтерологқа, инфекционистке, гепатологқа, хирургқа және травматологқа жібермеген; патогистологиялық зерттеу нәтижелерін алғаннан кейін пациентті онкологқа жіберуді кешіктірген.

Соттың бағалауынша, медицина қызметкерлері талдаулардағы өзгерістерге, пациенттің шағымдарына және оның жағдайының нашарлауына тиісінше көңіл бөлмеген. Бұл онкологиялық аурудың дер кезінде анықталмауына әкеп соққан.

Аурухана не дейді?

Медициналық мекеменің өкілі талап арызды мойындамады. Оның айтуынша, пациентке медициналық қызметтер толық көлемде көрсетілген, ал сараптамалар дәрігерлердің іс-әрекеті мен ер адамның өлімі арасындағы себеп-салдарлық байланысты растамаған.

Жауапкер тарап аурудың жасырын сипатта болғанын және болжамның қолайсыз болғанын алға тартты.

Пациентті емдеген дәрігер ер адамның нәжістің қараюы мен құсу белгілері бойынша жүгінгенін хабарлады. Оған ФГДС-тен өту және талдаулар тапсыру ұсынылған. Оның айтуынша, науқастың жағдайы нашарлағанда үйіне барып қаралған, бірақ диагноз кеш қойылған.

Сот шешімі

Сот дәрігердің іс-әрекетінен пациенттің отбасына моральдық зиян келтірілді деген қорытындыға келді. Бұл ретте, Азаматтық кодекстің 921-бабына сәйкес, медицина қызметкерлерінің заңбұзушылықтары үшін жауапкершілік медициналық мекемеге жүктеледі.

Ауруханаға қарсы талап арыз ішінара қанағаттандырылды. Медициналық мекемеден екі талап қоюшының әрқайсысының пайдасына 700 мың теңгеден өндіру туралы шешім шығарылды.

Өтемақының жалпы сомасы 1,4 миллион теңгені құрады. Сот шешімі заңды күшіне енген жоқ.

Google News арқылы жаңалықтарымызды қадағалаңыз

Жазылу

дәрігер

дәрігерлер

өтемақы

аурухана

қатерлі ісік

Сот