Балаларымызды өлтіруді тоқтатыңдар Германиядағы тәжіктер Ресей консулдығының алдына наразылыққа шықты

Наразылық шарасы Мәскеу түбінде қаза тапқан Кобилджон Әлиевтің өліміне байланысты ұйымдастырылды. Он жасар баланы мектепте пышақтап кеткен. Тергеу мәліметтері бойынша, 15 жасар оқушы мектеп күзетшісі мен балаға пышақпен шабуыл жасаған, деп хабарлайды Arasha.kz.

Германияның Бонн қаласында Ресей консулдығының алдында тәжік оппозиционерлері ұйымдастырған наразылық акциясы өтті. Митингіге бірнеше ондаған адам, соның ішінде балалар да қатысты.

Қатысушылар қаза тапқан баланың және бұған дейін Ресейде зорлық-зомбылық құрбаны болған немесе қаза тапқан басқа да тәжік балаларының суреттерін ұстап шықты. Акцияны Тәжікстанда тыйым салынған «Группа 24» оппозициялық қозғалысы ұйымдастырды. Митинг кезінде мигранттарға қатысты қатал мәлімдемелерімен танымал ресейлік саясаткерлер мен күш құрылымдарының өкілдері сынға алынды.

Жиналғандар Тәжікстан билігіне үндеу оқып, бірқатар ресейлік саясаткерлерді «персона нон грата» деп жариялауға және олардың елге кіруіне тыйым салуға шақырды.

Сонымен қатар, Ресейдің 201-ші әскери базасын Тәжікстан аумағынан шығарып, оның қару-жарағы мен инфрақұрылымын Душанбеге өткізу туралы талап қойылды.