Балқашта 750 миллиард теңгеге алып зауыт салынады

Қарағанды облысының Балқаш қаласында құны 750 миллиард теңге болатын жаңа мыс қорыту зауыты салынады. Жоба Мемлекет басшысының тапсырмасы бойынша жүзеге асырылып жатыр, деп хабарлайды Tengrinews.kz.

Қазақстан Үкіметі Өнеркәсіп және құрылыс министрлігі мен Qazaq Smelter ЖШС арасындағы мыс қорыту зауытын салу жобасы бойынша инвестициялық келісімді мақұлдады. Тиісті қаулыға премьер-министр Олжас Бектенов қол қойды.

Жаңа кәсіпорын Қарағанды облысының Балқаш қаласында орналасады. Құрылыс 2027 жылы басталып, зауытты пайдалануға беру 2030 жылға жоспарланған.

Жобаға құйылатын жеке инвестиция көлемі 750 миллиард теңгені құрайды.

Кәсіпорынның өндірістік қуаттылығы мынадай болмақ:

жылына 300 мың тонна катодты мыс; 10 тонна алтын; 300 тонна күміс; 1,5 миллион тоннадан астам күкірт қышқылы.

Зауытта 1,2 мыңға жуық тұрақты жұмыс орны ашылады.

Кәсіпорын іске қосылған сәтте қазақстандық мамандардың үлесі 90 пайызды, оның ішінде басшылық лауазымдарда да осындай көрсеткішті құрайтыны атап өтілді. Алдағы бес жыл ішінде бұл көрсеткішті 95 пайызға дейін жеткізу жоспарланып отыр.

Сонымен қатар инвестор Қарағанды облысының оқу орындарында 50 студентті оқыту бойынша міндеттемелерді өз мойнына алады.

Іске қосу Қазақстандағы мыс өндірісін бір жарым есеге - жылына 800 мың тоннадан астамға дейін арттыруға мүмкіндік береді. Болжам бойынша, қосылған құны жоғары өнім экспорты жылына 460 мыңнан 760 мың тонна мысқа дейін өседі.

Тағы оқыңыз: Зымыран кешендерін құрастырған Қазақстанның аңызға айналған зауыты сатылымға шығарылды

Google News арқылы жаңалықтарымызды қадағалаңыз

Жазылу