Банкаралық QR код жүйесі көп ұзамай іске қосылады Тимур Сүлейменов

Оның айтуынша, қазіргі уақытта еліміздегі барлық екінші деңгейлі банктер бірыңғай QR-код жүйесіне қосылған. Ұлттық банк маусым айында банктермен бірлесіп барлық техникалық жұмыстарды аяқтауды жоспарлап отыр. Нәтижесінде қазақстандықтар жаңа қызметті шілде айынан бастап пайдалана алады.

— Осы аптада біздің команда банктермен бірқатар кездесулер өткізіп, техникалық жұмыстар жүргізді. Жазға қарай бұл жүйені толық іске қосып, халыққа қолжетімді етеміз деп үміттенеміз. Тағы да қайталап өтейін, барлық құқықтық мәселелер реттеліп, заңнан бастап, бірыңғай жүйеге қосылу туралы келісімдерге дейін барлығы бекітілді. Енді тек техникалық мәселелер қалды. Жазда оны іс жүзінде іске асырамыз деп сенеміз, — деді ол.

Сонымен қатар оның сөзінше, екінші деңгейлі банктер жүйеге қосылу туралы келісімдерге қол қойған. Ал 19 шілдеден бастап заң нормалары күшіне еніп, банктер үшін бұл жүйеге қатысу міндетті болады.

Ұлттық банк төрағасы бұл жүйені енгізуде қауіпсіздік мәселесіне ерекше назар аударылып отырғанын атап өтті. 

— Әрине, мен де бұл процестің тезірек жүзеге асқанын қалаймын. Бұл, әрине, криптография, цифр, оны терең түсініп, төлемдердің қауіпсіздігін қамтамасыз ету қажет. Себебі бұл әртүрлі банктер арасындағы жүйе. Ақпарат алмасу кезінде жеке деректер, төлем туралы мәліметтер, төлеушіге қатысты ақпарат беріледі. Олардың барлығы толық қорғалуы тиіс. Әйтпесе, жақсы ойластырылған жобаның орнына мәселелер туындауы мүмкін, — деп түйіндеді Тимур Сүлейменов.

Сонымен қатар осы брифингте ведомство басшысы Ұлттық банктің базалық мөлшерлемені біртіндеп төмендетуі мүмкін екенін атап өтті.