Қазақстанда бірыңғай банкаралық QR төлем жүйесі іске қосылды

Бүгін Қазақстанда бірыңғай банкаралық QR-төлем жүйесі ресми түрде пайдалануға берілді.
Бұл туралы Алматыда өткен Central Asia Fintech Summit форумы аясындағы баспасөз мәслихатында ҚР Ұлттық банкінің төрағасы Тимур Сүлейменов мәлімдеді.

«Бүгін біз үлкен ұлттық жоба – бірыңғай QR жүйесін ресми түрде іске қостық. Бұл бастама, ең алдымен, қаржы қызметтерін пайдаланатын қарапайым азаматтардың өмірін жеңілдетеді. Сонымен қатар жалпы төлем жүйесінің тиімділігін арттырып, Орталық Азиядағы көшбасшылығымызды бекітуге мүмкіндік береді. Біз технология мен цифрландыру саласында әрдайым алдыңғы қатарда болуымыз керек», – деді Сүлейменов.

Қазақстанның ұлттық төлем корпорациясы басқармасының төрайымы Жанар Самаева өз сөзінде жүйенің пилоттық кезеңі өткен айда іске қосылғанын және жобаға алты ірі банк қосылғанын атап өтті.

«Бірегей QR қазірдің өзінде бірнеше миллион пайдаланушыға қолжетімді. Жүйеге Банк ЦентрКредит, Freedom Bank, Halyk Bank, Altyn Bank, RBK Bank және Home Credit Bank қосылды. Бұл бастаманы қолдаған серіктестерімізге алғыс білдіреміз», – деді ол.

Ұлттық төлем корпорациясының жоспарына сәйкес, сервис барлық өңірлер мен сауда кәсіпорындарын қамтиды. Жыл соңына дейін жүйеге тағы үш банк қосылуы мүмкін. Ал жоба толық көлемде 2026 жылы іске қосылады деп жоспарланып отыр.