Банкомат пайдаланушылардың жеке деректері тіркелмейді Ұлттық банк

Банк терминалдары арқылы қолма-қол ақша алатын азаматтардың деректер базасы мемлекет тарапынан құрылды деген ақпарат шындыққа жанаспайды.
Бұл туралы Жалған ақпаратқа қарсы іс-қимыл орталығы мәлімдеді. Орталықтың хабарлауынша, тараған ақпарат манипулятивті сипатқа ие. Сонымен қатар Қазақстан Республикасының Ұлттық банкі елімізде банкоматтар арқылы қолма-қол ақша алу фактілері бойынша ешқандай тізілімдер немесе деректер базасы қалыптастырылмайтынын ресми түрде растады.

Ұлттық банктің түсіндіруінше, қауіпсіздікті қамтамасыз ету мақсатында банкоматтар бейнебақылау камераларымен жабдықталады. Бұл камералар алаяқтық пен ұрлықтың алдын алуға, сондай-ақ құқықбұзушылықтарды тергеп-тексеру барысында дәлел ретінде пайдалануға арналған. Бейнежазбалар тек даулы жағдайлар мен заң бұзушылықтар кезінде қолданылады және банк клиенттері мен қаржы ұйымдарының мүддесін қорғауға бағытталған.

Аталған талаптар Ұлттық банк басқармасының 2016 жылғы 31 тамыздағы №205 қаулысымен бекітілген. Қаулыға сәйкес, банктер банкоматтарда төлем картасын ұстаушының бет-жүзін тіркеуге мүмкіндік беретін кемінде бір бейнекамера орнатуға міндетті. Ал 2026 жылғы 1 қаңтардан бастап бейнеақпаратты сақтау мерзімі кемінде 180 күнтізбелік күнді құрауы тиіс.

Сонымен бірге қолданыстағы заңнамада банкомат арқылы қолма-қол ақша алатын азаматтарды алу жиілігіне немесе сомасына қарамастан тіркеу жөнінде өзге талаптар көзделмеген.

Осыған байланысты Жалған ақпаратқа қарсы іс-қимыл орталығы контент жасаушыларды құқықтық нормаларды бұрмалап түсіндіруден және қоғамда негізсіз алаңдаушылық тудыратын ақпарат таратудан бас тартуға шақырды. Қосымша сұрақтар туындаған жағдайда азаматтар уәкілетті мемлекеттік органдарға eOtinish ақпараттық жүйесі арқылы ресми сауал жолдай алады.