Бардағы түннен кейін жоғалды: Гонконгте Атырау тумасы іздестірілуде

1986 жылы туған Атырау тумасы Евгений Загорко Гонконгте жоғалып кетті.

Ол соңғы рет 20-сынан 21 наурызға қараған түні Trilogy түнгі клубынан байланысқа шыққан. Осыдан кейін хабарласуды тоқтатып, апартаментіне қайтып оралмаған.

Жоғалғаны туралы ақпарат алғаш рет Threads әлеуметтік желісінде жарияланды. Постты Анастасия Алиева жазған. Кейін редакция оның өзіне хабарласып, ол жоғалған адамның жақыны екенін растады.

Алиеваның айтуынша, Евгений бір жағдайға душар болды деуге негіз бар. Ол екі күннен бері байланысқа шықпаған.

- Қазір кез келген ақпарат, кез келген дерек маңызды. Мүмкін араларыңызда Гонконгте жүргендер немесе ол жақта таныстары, достары, туыстары бар адамдар бар шығар, — деп жазды ол.

Жақындарының айтуынша, Загорконың Ресей және АҚШ азаматтығы бар. Гонконгте ол iSQUARE сауда орталығында орналасқан Ruby International апартаментінде тұрған. Жеке заттары орнында, бірақ өзі қайтып келмеген.

Тұрғын үйдің иесі жағдайды Airbnb платформасы арқылы хабарлап, полициямен ынтымақтасуға дайын екенін, соның ішінде бейнебақылау жазбаларын беруге әзір екенін жеткізген.

Алиеваның сөзінше, байланыс таңғы бес шамасында үзілген. Бұған дейін хабарламалар мессенджерлерде барып тұрған.

Ол сондай-ақ Загорконың жұмыс бабымен Лос-Анджелеске Сеул арқылы ұшуы тиіс болғанын, бірақ жоспарланған рейске отырмағанын айтты. Бұған дейін мұндай жағдай болмаған. 

— Бұл жай ғана телефон жоғалту емес екені анық. Ол бұрыннан жиі сапарға шығып жүрген адам, — деді Алиева.

Қазір жақындары оның маршрутын қалпына келтіруге тырысуда және полицияның көмегіне үміт артып отыр. Олар сондай-ақ АҚШ пен Ресей елшіліктерінің реакциясын күтуде және Қазақстан елшілігіне де жүгінуді жоспарлап отыр.

Алиеваның айтуынша, Евгенийдің әлі де Гонконгте болуы ықтимал. Жақындары баршаға оқиғаның хронологиясын айқындауға көмектесетін кез келген ақпаратпен бөлісуді өтінуде.

Айнұр САПАРОВА

Бүгін, 14:58