Бас, құтыламыз! СҚО да бөтеннің Palisade көлігін тізгіндеген жүргізуші полициядан қашпақ болды видео

Солтүстік Қазақстан облысында 55 жастағы ер адам полицейлерден қашамын деп өзгенің көлігін талқандады. Көлік өртеніп, жолаушылардың бірі ауыр жарақат алды, - деп хабарлайды Tengrinews.kz тілшісі.

Әлеуметтік желілерде теміржол өткеліндегі бақылау камераларына түскен видео тарады. Онда шетелдік көліктің жүргізушісі соңына түскен полицейлерден қашпақ болғаны көрінеді. Алайда қуғынның соңы қайғылы аяқталды: теміржол өткелінде көлік асқан жылдамдықпен келіп, қоршауға соғылады. Жүргізуші көліктен атып шығып, жақындап қалған полицейлерден қайта қаша жөнеледі.
Сондай-ақ видеоға көліктен түтін шыға бастағаны түсіп қалған. Кейін шетелдік көлік толығымен жанып кетті.

СҚО Полиция департаменті Tengrinews.kz тілшісіне берген мәлімет бойынша, Hyundai Palisade жүргізушісі Петерфельд ауылының маңындағы теміржол өткелінде жол апатына ұшырап, бой тасаламақ болған. Кейін оны полицейлер ұстады.

"Петропавлдан шыға берісте шетелдік көліктің жүргізушісі полицейлердің тоқтау туралы заңды талабына бағынбаған, бұл тәртіп сақшыларының күдігін тудырды. Ол асақан жылдамдықпен қозғалысын жалғастырып, жол жиегіндегі қоршауға соғылған, содан кейін оқиға орнынан қашып кеткен. Көлікте мас күйдегі екі жолаушы қалған. Олардың біріне полицейлер көмектескен, осыдан кейін көлік өртене бастаған", – деп түсіндірді ведомствоның баспасөз қызметі.

Жолаушылардың бірі, 41 жастағы ер адам ауруханаға жатқызылды. Қазіргі уақытта ол ем қабылдап жатыр.

Ұсталғаннан кейін ер адам полицейлерге көліктің жолаушылардың бірінің ағасына тиесілі екенін айтты. Оның сөзінше, ол танысының өтінішімен рөлге отырған.

Полициядан неге қашқанын түсіндірген жүргізуші мас жолаушылар оны "Бас, бас! Palisade қой, қаттырақ айда, құтылып кетеміз!" деп айдап салғанын мәлімдеді.

"Полиция қызметкерлерінің заңды талаптарына бағынбағаны, жол-көлік оқиғасын жасағаны және оқиға орнынан кетіп қалғаны үшін әкімшілік материалдар жиналды. Оның іс-әрекетіне барлық қажетті процестік әрекеттердің нәтижесі бойынша түпкілікті құқықтық баға беріледі", – деді СҚО ПД өкілдері.

Фото: СҚО ПД

Жол апатынан кейін көлік өртеніп, күлге айналды.

Google News арқылы жаңалықтарымызды қадағалаңыз