Бас шаһарда Шабыт халықаралық өнер байқауы өтті

Араға бірнеше жыл салып «Шабыт» халықаралық шығармашылық байқауы Астана төріне қайта оралды.

Мәдениет және ақпарат министрлігі мен қала әкімдігінің қолдауымен бүгін бас шаһарда дәстүрлі өнер додасының ашылу салтанаты өтті. Төрт күнге ұласатын байқауда 800-ден астам өнерпаз бақ сынайды. 

28-ші «Шабыт» шығармашылық байқауына еліміздің түкпір-түкпірінен өнерлі жастар жиналған. Дені камералық хор, академиялық ән орындау, камералық музыка, фольклорлық ансамбль, эстрадалық вокал, бейнелеу өнері бойынша топтасып өнер көрсетеді. Мұндағы жалқы бағыт - «Поэзия» жанры ғана. Көкшетаулық ақын Абылайхан Әшімхан өнер додасына 10 шақты өлеңін ала келіпті.

Абылайхан Әшімхан, фестивальге қатысушы:

- «Поэзия» бойынша ақындар өңір-өңірлерден келіп жатыр. Таныс еместерімен танысу, көрісу, тек жақсылық күтемін. Бұл  байқау 28-ші рет өтуде. Біздің алдымыздағы аға буын ақындар қатысқан. Сонысымен қызық болды. «Шабытқа» қатысу бала күнгі арманым.

Халықаралық сынға Қытай, Ресей, Өзбекстан, Әзербайжан сияқты тоғыз елдің өнерпаздары жиналған. Солардың қатарында қырғызстандық дуэт те бар. Олар қырғыз, испан және қазақ тілінде ән шырқамақ.

Урмат Сатыбалдиев, фестивальге қатысушы:

- Әртістер үшін таңдалған репертуардың маңызы зор. Әннің табиғаты орындаушыға жақын болуға тиіс. Әсіресе дует немесе триомен бірге ән шырқау оңай емес. Оны жүректен жүрекке жеткізу өз алдына, сол ән арқылы әртістердің де ашылғаны аса маңызды. Сол себепті таңдауымыз «Өмір-өзен» әніне түскен.

Айта кетерлігі, биыл «Креативті бағыт» аталымы қосылды. Мұнда заманауи медиа, цифрлық арт, мультимедиялық жобалар бағаланады. Жалпы әр аталымда бес адамнан құралған қазылар алқасы сайланған. «Шабыт» халықаралық байқауы соңғы рет жеті жыл бұрын өткен еді.

Раушан Нұртаза, «Шабыт» Қазақ ұлттық өнер университетінің Ғылыми-шығармашылық қызмет және халықаралық ынтымақтастық жөніндегі проректоры:

- Мысалы, ашылу және жабылу салтанаты біздің үлкен залда өтеді. Камерлық залда және Рахмадиев атындағы филармония залында өтеді. Барлық зал бос болмайды.

800-ден астам өнерпаздың шығармашылығы бірнеше көрме, ән мен саз концерттерінде сыналмақ. Сондықтан алдағы үш күнде Астана жұрты мен қонақтары мәдени нысандарға барып, байқау аясындағы іс-шараларды тегін тамашалай алады.

Авторлары: Бақыт Топтаева, Арман Ақшабаев