Бастапқы жарнасыз несие

«Отбасы банк» тұрғын үй құрылыс жинақ банкі» АҚ «Дипломмен – ауылға!» бағдарламасы аясында несие беруді жүйелі жүзеге асырып келеді. Несие мөлшерлемесі – 1%. Бастапқы жарна – 0%. Биыл бағдарлама алғашқы болып өтінім берген 200 отандасымызға жаңа баспана сыйлады.

Суретті түсірген – Ерлан ОМАР, «EQ»

Бағдарламаға ауылдар мен аудан орталық­тарына жұмыс істеуге келген тұрғындар қатыса алады. Несие қаражатын үй сатып алуға немесе салуға пайдалануға болады. Несие­нің ең жоғары сомасы – 2 500 айлық есептік көрсеткіш (АЕК) немесе 9 830 000 теңге, мерзімі – 15 жылға дейін.

Сонымен қатар ауыл тұрғындары көтерме жәрдемақы да алады. Бұл биыл 100 АЕК немесе 393 200 теңге көлеміндегі біржолғы төлем болды. Ол үйді жабдық­тауға, алғашқы қажетті заттарды сатып алу­ға көмектеседі.

Қаржыландыруды мемлекет жүзеге асырады. Бағдарламаға техникалық, кәсіптік, жоғары немесе жоғары оқу орнынан кейінгі білімі бар, сондай-ақ кемінде үш жыл еңбек өтілі бар тұрғындар қатыса алады. Қатысушылар білім беру, денсаулық сақтау, әлеуметтік қамсыздандыру, агроөнеркәсіп кешені, мәдениет, спорт, ауылдық округтер әкімдері аппараттарындағы мемлекеттік қызмет (әкімдер мен олардың орынбасарларын қоспағанда) сынды сұранысқа ие салаларда жұмыс істеуге тиіс.

Жыл сайын жергілікті әкімдіктер жоғары­да аталған бағыттар жөнінде сұраныс­қа ие мамандар тізімін жасайды. Несиелер дәл осы тізім аясында беріледі. Сондықтан бағдарламаға қатысқысы келетін азаматтар ең алдымен, өз елді мекенінің әкімдігіне барып, қай мамандықтардың қажет екенін нақтылауы керек. Егер әкімдік, мысалы, дәрігер немесе агроном қажет екенін растап, тұрғынды тұрғын үй мәселесін шешуде қолдауға дайын болса, онда маманға ба­ғыт­та­ма береді. Осыдан кейін ауыл тұр­ғыны Baspana Market (otbasybank.kz) порталында өтінім бере алады.

«Дипломмен – ауылға!» бағдарламасы Қостанай облысының тұрғыны, үш баланың әкесі Валерий Барышевке бастапқы жарнасыз өз үйін сатып алуға мүмкіндік берді. Бірнеше жыл бұрын университетті тәмамдаған жас ма­манға қалада өз мамандығына сай жұмыс табу, баспана мәселесін шешу қиынға соқты. Пәтерақы қымбат, бастапқы жарнаға қара­жат жинау мүмкін емес. Сол себепті Калинин ауылдық округінің әкімдігіне маман болып жұмысқа орналасып, ауылда өз бағын сынап көруді ұйғарған. Сол жерде «Дипломмен – ауылға!» бағдарламасы туралы білген.

– «Дипломмен – ауылға!» бағдарламасы болмағанда, біз әлі де баспанасыз жүретін едік. Тұрғын үй мәселесін шешуге арналған мүмкіндікті барынша пайдалану керек. Қалада жылдар бойы жалдамалы пәтерде тұруға болады, ал ауылда осылай тез арада  бас­паналы болып, балаларды жайлы ортада өсіруге мүмкіндік бар, – дейді қуанышымен бөліскен В.Барышев.

«Дипломмен – ауылға!» бағдарламасының операторы – «Отбасы банк». Банк өтінім қабылдау мен несие беру үдерісін толығымен онлайн форматқа ауыстырды. Өйткені көптеген ауыл банк бөлімшелерінен алыс орналасқан. Қашықтан қызмет көрсету аза­маттардың уақытын үнемдеп, мемле­кеттік қолдауға қол жеткізу үдерісін едәуір жеделдетті. Сонымен қатар «Отбасы банк» әкім­діктермен деректер алмасуды автомат­тан­дырды. Бұл келісу мерзімдерін қыс­қартуға, қаражат бөлу ашықтығын арт­тыруға, клиенттерге қолайлы жағдай жасауға мүмкіндік берді. Бағдарлама қатысушылары өтінім мәртебесі мен хабарламаларды онлайн алады, сондай-ақ несиені мерзімінен бұрын онлайн өтей алады. Бағдарлама өз тиімділігін дәлелдеді. Ол өңірлерде, ауылдық жерлерде білікті кадрларды ұстап қалуға нақты көмектесіп отыр. Кейінгі екі жылда осы бағ­дарламаның арқасында 7 188 отба­сы баспана мәселесін шешті. 2023 жылы 17,7 млрд теңгеге 3 483 несие берілді, 2024 жылы 29,6 млрд теңгеге 3 705 несие рәсімделді.