Батуми портын ҚазТрансОйл Орта дәліздің дамуына қосты

«ҚазТрансОйлға» тиесілі Батуми теңіз порты Орта көлік дәлізін дамытудағы негізгі буындардың біріне айналмақ. Бұл туралы компания Әзербайжан және Грузия серіктестерімен өткен жұмыс кездесуінің қорытындысында хабарлады, деп хабарлады «Нефть и газ Казахстана» телеграм арнасы.

Батуми теңіз портының бас директоры Ұлан Тілеуғали порт нысандарында Әзербайжан темір жолдарының басқарма төрағасы Ровшан Рустамовпен және Грузия темір жолының бас директоры Лаша Абашидземен келіссөздер жүргізгенін атап өтті. Тараптар Баку – Тбилиси – Карс бағытының жаңа даму кезеңін талқылады.

Бұған дейін қол қойылған Марабда – Карцахи желісі бойынша эксклюзивті тасымал келісімінің аясында Батуми порты транзиттік жүктерді халықаралық нарықтарға шығаруды қамтамасыз ететін маңызды теңіз торабы ретінде қарастырылуда. Серіктестер оның Орта дәліздің тұрақты логистикасын қалыптастырудағы рөлін ерекше атап өтті.

Сонымен қатар порттың теміржол операторларымен жұмысты үйлестіру мәселесіне назар аударылды. «ҚазТрансОйл» деректеріне сәйкес, теңіз және теміржол инфрақұрылымының келісілген жұмысы бағыттың өткізу қабілетін арттырып, сенімділігін күшейтеді және халықаралық тасымалдаушыларға бәсекеге қабілетті логистикалық шешімдер ұсынады.

Бүгін, 17:30