BAZIS A корпорациясы Баума тоғайына қатысты маңызды мәлімдеме жасады

Әлеуметтік жауапкершілігі аясында «BAZIS-A» корпорациясы Баума тоғайын қайта абаттандыру жобасының демеушісі ретінде 4,7 млрд теңге бөлді. Бұл қаражат мегаполистің маңызды экологиялық аумағын жаңғыртуға және алматылықтар мен қала қонақтарына арналған заманауи экологиялық демалыс аймағын құруға бағытталған.

Жобаны Алматы қаласы әкімдігінің тапсырысы бойынша әзірлеген, ал оны жүзеге асырып жатқан бас мердігер — «СК Барлас Құрылыс» ЖШС. Барлық жұмыстар бекітілген жобалау-сметалық құжаттамаға толық сәйкес орындалуда.

«Өкінішке қарай, әлеуметтік желілерде кейбір пайдаланушылар компанияның іскерлік беделіне нұқсан келтіруі мүмкін жалған ақпарат таратып жатыр. Әңгіме Баума тоғайында тұрғын немесе тұрғын емес нысандар салынады деген негізсіз мәліметтер туралы болып отыр.

“BAZIS-A” корпорациясы ресми түрде мәлімдейді: бұл ақпарат шындыққа сәйкес келмейді.

Корпорация да, реконструкция жүргізіп жатқан мердігер ұйым да Баума тоғайының аумағында тұрғын немесе тұрғын емес нысандар салуды қазір де, болашақта да жоспарламайды.
Әлеуметтік желі қолданушыларын тексерілмеген және жалған ақпарат таратпауға шақырамыз», — делінген компания хабарламасында.

Сонымен қатар, «СК Барлас Құрылыс» ЖШС өсімдіктерді санитарлық кесу немесе ағаштарды шабу жұмыстарымен айналыспайтыны атап өтілді, себебі бұл олардың құзыретіне кірмейді және жоба аясында қарастырылмаған. Санитарлық кесу мен ағаштарды жою жұмыстары Алматы қаласы Экология және қоршаған ортаны қорғау басқармасына қарасты “Медеу” мемлекеттік өңірлік табиғи паркінің құзыретінде.

Мердігер компания жұмыстарды орындау кезінде жасыл желекті сақтау және қорғау бойынша барлық қажетті шараларды қабылдауда. Мысалы, кейбір балалар және спорт алаңдары қалың өсімдігі жоқ учаскелерге ауыстырылды.

Бекітілген жобалау-сметалық құжаттамаға сәйкес, бірде-бір ағашты кесу жоспарланбағаны ерекше атап өтіледі.

25-тен 26 қазанға қараған түні болған ағаштардың зақымдануы фактісі бойынша «СК Барлас Құрылыс» ЖШС-нің өкілі құқық қорғау органдарына тиісті өтініш берді. Компания кінәлі тұлғалар анықталып, заңға сәйкес жауапқа тартылады деген үміт білдірді. Сондай-ақ барлық құрылыс жұмыстары сағат 17:00-ге дейін жүргізіліп, содан кейін барлық жұмысшылар тоғай аумағынан толық шығатыны хабарланды.

Бұған дейін хабарланғандай, жобаның негізгі инженерлік шешімі — экологиялық таза материалдарды пайдалану. Барлық жаяу жүргіншілер жолдары мен соқпақтар су өткізгіш жабыннан — ұсақ престелген қиыршық тастан жасалады. Мұндай жабын топырақтың «тынысын» сақтап, кез келген ауа райында ыңғайлы жүруге мүмкіндік береді. Бетон тек балалар мен спорт алаңдарының негізіне қолданылады, олардың үсті жұмсақ соққыны азайтатын жабынмен қапталады. Техникалық жүріс жолы тоғай периметрі бойымен асфальтталады.

Қауіпсіздік пен жайлылықты арттыру мақсатында энергоүнемді жарықтандыру жүйесі орнатылады: белсенді аймақтарда биіктігі 4,5 метрге дейінгі тіректер, ал экологиялық аймақтарда биіктігі 1 метрге дейінгі төмен жарық шамдары орнатылады. Олар жұмсақ жарық беріп, табиғи экожүйеге зиян келтірмейді және реконструкциядан кейін келушілерге тоғайда тәуліктің қараңғы уақытында да қауіпсіз серуендеуге мүмкіндік береді.