Бейнежазбаға түсіру: Алматыда мұғалімдер оқушыларды флешмоб үшін суықта ұзақ ұстаған

Әлеуметтік желіде ата-аналар Алматыдағы 117 мектепте күздің суық күнінде оқушылардың флешмоб үшін далада ақ жейдемен ұзақ уақыт тұрғанына шағымданды. Ұстаздар сырт киімде жүріп, ал жеңіл киімдегі оқушыларды блогер мен оператор келгенше күттіріп қойған деп хабарлайды Аikyn.kz

Ата-аналардың шағымы бойынша, оқушыларды видеоға сағат 13:00-де түсіріп бастауы керек болған. Бірақ балалар 13:50-ге дейін, яғни 50 минут бойы мобилограф пен блогердің келуін күткен.

"Осы уақыт ішінде балалар сыртта, ауа температурасы +14°C болып тұрғанда, күртесіз, тек жейде киіп тұрған. Ал мектеп әкімшілігі сол уақытта өздері күрте, тіпті кейбірі тон киіп алған. Балаларды суықта бір сағатқа жуық уақыт бейнежазба үшін тұрғызып қою дұрыс па? Ұйымдастырушылар қайда қарап отыр? Бұл енді баланы қорлау сияқты”, – деп жазды ата-ананың бірі. 

Өзге ата-аналар да мектептің бұл әрекетін сынға алды. Осы жайтқа байланысты Алматы қаласы №117 жалпы білім беретін мектеп әкімшілігі аталған іс-шара мектеп әкімшілігінің ұйымдастыруымен Республика күніне орай өткізілгенін хабарлады. 

- Флешмобты түсіру уақыты 15 минуттан аспады. Іс-шара өткізілген сәтте ауа температурасы +16 °C шамасында болды. Бұл ашық ауада қысқа мерзімді іс-шара өткізуге арналған санитарлық талаптарға сай келеді. Мектеп әкімшілігі қолдау мен сенім білдіргендерге алғыс айта отырып, алдағы уақытта мұндай іс-шараларды ұйымдастыруда барлық ескертулер мен ұсыныстарды ескеретінін хабарлайды”, – деді мектеп әкімшілігі.