Бейсбол таяғымен 28 рет соққы жасады : Қазақстанда 52 жастағы әйелді күйеуі аямай ұрып өлтірген

52 жастағы әйелдің өліміне қатысты қылмыстық іс бойынша сот процесі 29 шілдеде басталады, – деп хабарлайды Aikyn.kz сайты.

Марқұмның туыстарының айтуынша, қайғылы оқиғаға дейін әйел биыл сәуір айында күйеуіне ажырасқысы келетінін айтқан.

Kriminal Kazakhstan мәліметінше, осыдан бірнеше күн өткен соң ер адам әйелдің жеке заттарын, құжаттарын және олардың ортақ балаларының құжаттарын өртеп жіберген. Тергеу нұсқасына сәйкес, кейін күдікті әйелді аңдып жүріп, оған бейсбол таяғымен шамамен 28 рет соққы жасаған. Ауыр дене жарақатын алған әйел оқиға орнында көз жұмған.

Марқұмның жақындарының сөзінше, күдікті ұзақ жылдар бойы ішімдікке тәуелді болып, әйеліне үнемі күш көрсеткен. Әйел ажырасуға шешім қабылдағаннан кейін де оны аңдуын тоқтатпаған. Қылмыстан кейін ер адам оқиға орнынан қашып кеткен. Алайда көп ұзамай оны құқық қорғау органдары ұстап, қамауға алған.

Қазіргі уақытта «Кісі өлтіру» бабы бойынша қозғалған қылмыстық іс бойынша тергеу аяқталған. Іс 29 шілдеде сотта қарала бастайды.