Бектенов майнинг үшін газ бен көмірді пайдалануды тапсырды

Премьер-министр Олжас Бектенов майнинг орталықтарын электр энергиясымен қамтамасыз ету үшін газ және көмір генерациясын пайдалану мәселесін пысықтауды тапсырды. Бұл туралы ол цифрлық активтер индустриясын дамытуға арналған үкімет отырысында мәлімдеді, деп хабарлайды Tengrinews.kz тілшісі.

Бектенов биржаларды, цифрлық қаржы құралдарын, токенизация және активтерді сақтау сервистерін, сондай-ақ төлем шешімдерін қамтитын толыққанды цифрлық активтер индустриясын қалыптастыру қажеттігін мәлімдеді.

"Энергетика министрлігіне Жасанды интеллект және цифрлық даму министрлігімен бірлесіп, майнинг орталықтарының жұмысын қамтамасыз ету үшін газ және көмір генерациясын пайдалану механизмін пысықтау қажет", - деп тапсырды премьер.

Бұған дейін үкіметте азаматтарды цифрлық активтермен жасалатын операциялардан түсетін табыс бойынша жеке табыс салығынан үш жылға босату ұсынылған болатын. Жеңілдікті қазақстандық провайдерлер арқылы жүргізілген мәмілелерге қолдану жоспарланып отыр. Бастама туралы толығырақ сілтеме бойынша оқыңыз.

2024 жылғы 7 шілдеде Президент Қасым-Жомарт Тоқаев цифрлық активтер индустриясын ынталандыру және дамыту туралы жарлыққа қол қойды. Құжат реттелетін нарықты кеңейтуді және Қазақстан экономикасына цифрлық активтерді тарту үшін жағдай жасауды қарастырады.

Тағы оқыңыз: Қазақстандықтарға өз активтерінің бір бөлігін ерікті түрде ашу ұсынылады

Бізді Google-дың негізгі дереккөздер тізіміне қосыңыз