Бектенов: ҚТЖ алдында транзиттік тасымалды 55 млн тоннаға жеткізу міндеті тұр

Премьер-министр Олжас Бектенов Қазақстанның Еуразия кеңістігіндегі ірі көлік-логистикалық хабқа айналуы үшін теміржол инфрақұрылымын дамытудың жаңа кезеңіне көшу қажет екенін мәлімдеді.

Үкімет отырысында сөйлеген сөзінде Премьер-министр соңғы жылдары теміржол саласында ауқымды жұмыстар атқарылып жатқанын атап өтті. Оның айтуынша, жаңа теміржол желілері салынып, вагондар мен локомотивтер паркі жаңартылып жатыр. Сонымен қатар қолданыстағы жолдар модернизацияланып, вокзалдарды қайта жаңғырту жұмыстары жүргізілуде.

Биыл Мемлекет басшысының тапсырмасымен бірнеше ірі инфрақұрылымдық жобаны аяқтау жоспарланған. Олардың қатарында «Дарбаза – Мақтаарал» және «Мойынты – Қызылжар» теміржол желілері бар. Үкімет басшысы аталған бағыттардағы қозғалысты осы жылдың қараша айында іске қосуды тапсырды.

«Жаңа теміржол желілерінің ашылуы транзиттік тасымал көлемін биыл 55 миллион тоннаға дейін жеткізуге мүмкіндік береді. Бұл – Көлік министрлігі мен "Қазақстан темір жолы" компаниясының алдында тұрған негізгі міндеттердің бірі», – деді Олжас Бектенов.

Премьер-министрдің айтуынша, қазіргі жобалармен шектеліп қалмай, саланы дамытудың келесі кезеңіне қазірден бастап дайындалу қажет. Осы мақсатта Көлік министрлігі, Қазақстан темір жолы және Самұрық-Қазына барлық перспективалы инфрақұрылымдық жобалар бойынша қаржыландыру көздерін айқындап, техникалық құжаттамаларды әзірлеуге кірісуі тиіс.

Сондай-ақ Үкімет басшысы жүк айналымы мен транзиттік тасымал көлемінің алдағы өсімін ескере отырып, теміржол желілерін дамыту жөнінде батыл шешімдер қабылдаудың маңызын атап өтті.

Бұдан бөлек, мемлекетаралық өткізу бекеттерінің өткізу қабілетін кеңейту экспорттық және транзиттік жүк тасымалын арттыруға мүмкіндік береді. Осыған байланысты көршілес мемлекеттердің теміржол әкімшіліктерімен бірлескен жұмысты күшейту қажеттігі айтылды.

Сарапшылардың пікірінше, теміржол инфрақұрылымын жаңғырту Қазақстанның халықаралық көлік дәліздеріндегі рөлін күшейтіп, елдің транзиттік әлеуетін арттыруға жол ашады.