Бензин бағасы қай деңгейде сақталады тәртібі жарияланды

АСТАНА, 18 қазан – Sputnik. Энергетика министрлігі АИ-92 бензині мен дизель отынының бөлшек сауда бағасына енгізілген уақытша мораторийдің іске асу тәртібін түсіндірді, деп хабарлайды Sputnik Қазақстан.

Республика бойынша бірыңғай шекті баға белгіленбейді. Жанар-жағармай стансаларында АИ-92 бензині мен дизель отынының бағасы 16 қазандағы деңгейде сақталады.

"Қазіргі таңда ірі жанармай құю бекеттерінде АИ-92 маркалы бензин бағасы литріне 213–239 теңге, дизель отыны – 317–337 теңге аралығында. Бәсекелестікті қорғау және дамыту агенттігі тарапынан күнделікті мониторинг жүргізіліп, қажет болған жағдайда монополияға қарсы шаралар қабылданатын болады", - делінген ресми хабарламада.

Қазіргі кезде Қазақстанда жанар-жағармай қоры 3–4 аптаға жеткілікті. Оны күн сайын толықтырып отырады. Екі отандық мұнай өңдеу зауыты штаттық режимде жұмыс істеп тұр.

Ал Атырау мұнай өңдеу зауыты жоспарлы жөндеуден кейін 25 қазаннан бастап кезең-кезеңімен іске қосылады.

Айта кетері, АИ-92 бензині мен дизель отынының бөлшек сауда бағасына енгізілген уақытша мораторий инфляция тұрақты болғанға дейін енгізіліп отыр.