Бензин мен тариф бағасы көтерілмейді

Бензин мен тариф бағасы қымбаттамайды. Бұл туралы бүгін Премьер-министрдің қатысуымен өткен кеңесте айтылды.  

Бүгіннен бастап АИ-92 маркалы бензин мен дизель отынының бағасына мораторий енгізіледі. Ал коммуналдық қызмет тарифтерін көтеру келер жылдың І тоқсанының соңына дейін тоқтатылады. Жиында Үкімет басшысы тисті ведомстволарға осыған қатысты бірқатар тапсырма жүктеді. Сондай-ақ әлеуметтік маңызы бар азық-түліктің қымбаттауына жол бермеу шаралары қаралды. Ол үшін отандық ауыл шаруашылығы тауарын өндірушілерді қаржыландыру көлемі екі есеге артады. Одан бөлек, шағын және орта бизнеске салықтық жеңілдіктер қарастырылмақ. Сонымен қатар халық үшін ипотекалық несие көлемі екі есе ұлғаяды. Мәселен, «Наурыз» және «Наурыз-Жұмыскер» бағдарламалары арқылы несиелеу көлемін 500 млрд теңгеге дейін көбейту жоспарланып отыр. Ал «Әскери баспана» бағдарламасы қайта іске қосылады. Ол жыл сайын кемінде жеті мың әскери қызметшінің пәтер алуына мүмкіндік береді. Осы орайда құрылыс компанияларымен офтейк-келісімшарттар жасалады. Тұрғындарға жеңіл автокөлік сатып алу бойынша лизинг тетігі енгізіледі.