Коммуналдық тариф көтерілмейді

Коммуналдық қызметтердің құны көтерілмейді.

Келер жылдың екінші тоқсанына дейін елде тарифтерді өсіруге тоқтау салынды. Уақытша тыйым кеше күшіне енді. Бұл жайлы бас қалада өткен Үкімет кеңесінде премьер-минстр Олжас Бектенов мәлімдеген еді. Жаңа өзгеріс өндіріс орындарына қалай әсер етеді? 

- Иә, кешегі үкімет кеңесіндегі шешім көпшіліктің көңіліне қуаныш сыйлағаны белгілі. Дегенмен,осы тұста бұл өзгеріс өндіріс орындарына үшін қаншалықты тиімді деген заңды сауал туындайды. Себебі елдегі энергетика желілер, жылу орталықтары тозып тұр. Ескірген инфрақұрылымды жаңғыртамыз дегенді желеу етіп, жауаптылар тарифті дүркін-дүркін өсіргенін де білеміз. Ал енді оған тоқтау салынды. Енді оған қандай шешім бар, тілші шолуында толығырақ тарқатайын.

Үшінші тоқсандағы қорытынды статистикаға сүйенсек, елде коммуналдық қызметтердің құны айтарлықтықай өскен. Мәселен, бір жылда суық су 96, жылу 19, газ - 15 пайызға қымбаттаған. Сол секілді ыстық су 15, электр энергиясының бағасы 11 пайызға өскен. Бұған жауаптылар саладағы нысандарды жаңғырту мен қызметкерлердің жалақысын көтеру үшін барған. Енді бұлай болмайды. Үкімет сәуірге дейін тарифтердің өсуін тежеуге тапсырма берді.

Суық су - 96,1%

Жылу - 19,2%

Газ - 15,5%

Ыстық су - 15,5%

Электр энергиясы - 11,3%

Асан Дарбаев, ҚР Ұлттық экономика вице-министрі:

- Үкімет әзірлеген кешенді шаралар халықтың өмір сүру сапасын арттыруға бағытталған. Ең алдымен, халық үшін тарифтердің өсуі тежеледі. Әңгіме электрмен, энергиямен, сумен жабдықтау, кәріз жүйесі және газбен қамтамасыз ету сияқты коммуналдық қызметтер туралы болып отыр. Сонымен қатар, біз көрсетілетін қызметтердің сапасын арттыруға басымдық береміз. Сондай-ақ тұрғын үй-коммуналдық шаруашылығының тұрақты және үздіксіз жұмыс істеуін қамтамасыз ету үшін барлық қажетті шараларды жүзеге асырамыз.

Дегенмен, жаңа өзгеріс бұқарамен бірге бизнес өкілдеріне де тиімді болуы шарт. Осы орайда билік өкілдері жеке секторға да жәрдемсуге ниетті. Мәселен, көмір бағасы мен логистика құнын қымбаттауға да шектеу салынады. Яғни өндіріс орындарының шығынын азайту арқылы коммуналдық қызметтердің құнын қалыпта ұстап тұруға мүмкіндік туады.  

Сұңғат Есімханов, ҚР Энергетика вице-министрі:

- Осы саладағы істеп жатқан мекемелердің барлық шығындарын оптимизация ретінде қарастырып, бүгінгі күні олардың өсіп жатқан шығындарын өсірмеу бағытында тиісті көмір бағасын, темір жол саласындағы бағалардың да өспеуін қамтамасыз етіп, осы саладағы коммуналдық тарифтердің өспеуін де толық қамтамасыз етіледі. Ол жаңа айтылғандай мемлекет басшылығының берген тұрақтылық жайлы берген тапсырмасына сәйкес орындалады деп толық айтамыз. 

Сол секілді елде жанар-жағармай бағасы да бақылауда болады. Бұл да өндіріс орындарының шығындарын азайтуға бағытталған шешімдердің бірі. Әрі халыққа қарайласудың шешімі.  

Сұңғат Есімханов, ҚР Энергетика вице-министрі:

- Ең алдымен  жанармай бағасының өспеу мәселесін қарастырып жатырмыз. Бүгінгі күннен бастап тиісті мораторий жарияланады. Бұл бағыттағы барлық өсімдер тоқтатылады. Қазіргі кездегі біздің нарықтағы бағамен бәсекелестікті қорғау агенттігімен бірігіп, барлық осы саладағы істеп жатқан әріптестермен осы тиісті жұмысты толық атқарамыз.

Ал әлеуметтік әлеуеті төмен отбасылар үшін тұрғын-үй көмегі қарастырылған. Яғни, коммуналдық төлемдердің бір бөлігін мемлекет төлеп беруге мүдделі. 

Думан Қалибеков, ҚР ҰЭМ Табиғи монополияларды реттеу комитетінің жетісу облысы бойынша  департаменті басшысы:

- Осал топтар, отбасылар бар ғой, жағдайлары төмен. Осы жергілікті атқарушы органдар тарапынан коммуналдық шығындарды өтеу бойынша, белгілі бір бес пайыздан астам  коммуналдық шығындарды  мемлекет тарапына өздері өтеуге, яғни бұл сома тікелей тұтынушыларға аударылмай, солардың есеп-шоттары арқылы табиғи монополия субьектілеріне аудару арқылы осы коммуналдық шығындармен тиісті белгіленген пайызын жауып отырады. 

Сондай-ақ үкімет отырысынды жаңғырту жұмыстарының да жай-жапсары айтылды. Жауаптылар желілер мен орталықтарды жөндеуді жүйелі һәм уақытылы жүргізуге міндетті. Айтайық, алдағы бес жылдың бедерінде елде 86 мың шақырым коммуналдық желі жөнделіп, жаңадан салынады. Сондай-ақ жаңа энергия көздері бой көтереді. Ол үшін секторға 13 трлн теңге сыртқы салым тартылады. 

Коммуналдық желілер - 86 мың км

Генерция көздері - 7,3 ГВт

Инвестиция көлемі - 13 трлн теңге