Бетоннан жақсы, бірақ түсі көз қарықтырады : алматылықтардың бәрі бірдей Есентай жағалауын ұнатқан жоқ

Есентай жағалауындағы бетон қабырғаға салынған ашық түсті суреттер Алматы тұрғындары арасында түрлі пікір тудырды. Бірі ою-өрнек жағалаудың үйреншікті бейнесіне сай келмейді десе, енді бірі жаңашылдықты оң бағалады. Қала әкімдігі ерекше арт-шешімнің мән-жайын түсіндірді, деп хабарлайды Tengrinews.kz.

Оғаш түс пе, әлде жаңа көрікті жер ме?

Алматы тұрғыны әлеуметтік желіде жазба жариялап, Есентай өзені жағалауының жаңа кейпіне көңілі толмайтынын білдірген. Автордың пікірінше, ашық түсті суреттер бұл жердің қалыптасқан стиліне үйлеспейді.

Аудан тұрғындарының тағы бір наразылығы - бұл аумақты бояу туралы шешім олармен келісілмеген.

Threads әлеуметтік желісінен скриншот

Пікір қалдырушылардың бір бөлігі жазба авторын қолдады:

"Өте нашар. Қандай да бір тұжырымдама болуы керек емес пе?".

"Иә, көрдім, өте қанық түстер. Қанық деген жұмсартып айтқанда, тіпті түрлі түспен жанып тұр, не үшін екені түсініксіз".

Ал басқаларына, керісінше, жаңа көрініс ұнаған, бірақ ескертулері бар:

"Керемет, ең бастысы сұрқай емес, депрессиялық емес. Бірақ әдетте монументалды өнерде қызыл мен жасылды араластыра бермейді".

"Сұр бетоннан әлдеқайда жақсы, бірақ түсі оғаш".

Алматы әкімдігі жағалаудың Бұқар жырау көшесінен Тимирязев көшесіне дейінгі аралығында Алматыға арналған жаңа қалалық арт-маршрут жасалып жатқанын түсіндірді.

Үйреншікті бір түсті бетонның орнына мұнда ұзыннан-ұзақ созылған көркем композиция пайда болады. Жоба негізіне қала туралы әндердің жолдары алынған. Олар маршрут бойына орналастырылып, адам Есентай жағалауымен серуендеп келе жатқанда біртіндеп біртұтас визуалды хикаяға ұласады.

Фото: Алматы әкімдігі

Сондай-ақ жағалауда QR-кодтар орналастырылады. Олардың көмегімен музыкалық шығарманы қосып, композицияның әр бөлігінен ән мәтіндерін тауып, маршрутпен жүріп өтуге болады.

"Стрит-арт идеясы қозғалысқа негізделген және адам Есентай бойымен жүріп келе жатқанда біртіндеп ашылады", - деп атап өтті әкімдік өкілдері.

Фото: Алматы әкімдігі

"Бетонды безендіру үшін сыртқы жұмыстарға арналған кәсіби қасбеттік бояу мен Arton мамандандырылған граффити-бояуы қолданылады", - деді баспасөз қызметі.

Әкімдік мәліметінше, материалдарды таңдау кезінде олардың ауа райына төзімділігі, түсінің сақталуы және жабынның беріктігі ескерілген.

Жоба, жағалауды абаттандыру жұмыстары сияқты, демеушілік қаражат есебінен жүзеге асырылып жатыр.

Тағы оқыңыз: Ашты, жапты және қайта ашты: Сац атындағы театр маңындағы алаң не болды?

Бізді Google-дың негізгі дереккөздер тізіміне қосыңыз