Бидайды терең өңдеу жобалары қолға алынды

Ұлттық құрылтайда экономиканы дамыту тетіктері жыл сайын талқыланып келеді.

Соның негізінде бірқатар шара нақты жүзеге асып жатыр. Мәселен, мал шаруашылығын қолдауға арналған кешенді бағдарлама бекітілді. Көлік-транзит әлеуетін арттыру үшін тағы ірі жоба қолға алынды.

Мал шаруашылығын қолдаудың жаңа тетігі

Қазақстан бес жыл ішінде ауылшаруашылық өнімдерін еселеу керек. Бұл былтырғы Ұлттық құрылтайда Мемлекет басшысы жүктеген міндеттердің бірі. Соның негізінде Үкімет мал шаруашылығын дамытуға арналған бесжылдық кешенді жоспардың жобасын мақұлдады. Құжатқа сәйкес, ірі қара санын 8 млн-нан 12 млн басқа, ұсақ мал санын 20 млн-нан 28 млн басқа дейін көбейту көзделген. Ал ет өндірісінің көлемін тағы 600 мың тоннаға дейін ұлғайту және оның экспортын кемінде екі еселеу жоспарланып отыр. Шаруаларға асыл тұқымды мал сатып алу және жайылымдық инфрақұрылымды қалыптастыру үшін 6 пайыздық мөлшерлемемен несие беріледі. Ал мал бордақылайтын фермерлердің айналым қаражатын толықтыру үшін бөлек несие қарастырылып отыр. Сондай-ақ саланы кадрлармен қамтамасыз ету және оларға әлеуметтік қолдау көрсету шаралары енгізілген.

Мал шаруашылығын кешенді дамыту

( 2026-2030 ж )

Ірі қара  7,9 млн бас - 12 млн бас

Ұсақ мал      20,2 млн бас - 28 млн бас

Ет өндірісі  1,2 млн тонна - 1,8 млн тонна

Ет экспорты 82 мың тонна -165 мың тонна

Аманғали Бердалин, ҚР Ауыл шаруашылығы вице-министрі:

- Сиыр еті және қой еті экспорты бойынша Қазақстанның әлемдік көшбасшыларының біріне айналуына барлық мүмкіндік бар. Алғаш рет бордақылау алаңдарының айналым қаражатын толықтыруға 5 пайыз мөлшерлемемен 12 ай мерзімге дейін жеңілдетілген несиелеу бағдарламасы іске асуда. Бағдарлама аясында 50 млрд теңге қарастырылған.

Бидайды терең өңдеу жобалары қолға алынды

Ал бидайды терең өңдеп, дайын өнім өндіру және әлемдік нарыққа шығарудан Қазақстан он жыл ішінде үздік 10 елдің қатарына қосылуға тиіс. Бұл да былтырғы Ұлттық құрылтайда талқыланған маңызды мәселе. Ауыл шаруашылығы министрлігі қазір 5 ірі жоба жүзеге асырылып жатқанын хабарлады. Барлығын қоса алғанда, онда жылына 5 млн тоннаға жуық бидай мен жүгері өңделеді. Бұл жобаларға 2,5 млрд доллардан астам инвестиция тартылған. Сонымен қатар аминқышқылы, сироп, дәрумен шығару арқылы өнім түрлерін кеңейту жоспарланып отыр. Тауарлар Еуропа, ТМД, Таяу Шығыс, Африка мемлекеттері және АҚШ, Қытай, Үндістанға бағытталады.

Көлік-транзит саласында ірі жоба басталды

Әлемдік державалардың барлығы сауда-саттықпен тікелей байланысты болып тұрған көлік-транзит саласына ерекше көңіл бөледі. Ал тұтас Еуропа мен Азияны жалғап тұрған Қазақстан үшін бұл экономикалық тұрғыда теңдессіз мүмкіндік. Президент елімізді Еуразияның көлік-логистикалық хабына айналдыру керек екенін айтты. Дәл осы бағытта «Астана – Арқалық – Торғай – Ырғыз» автожолын салуды тапсырды. Бұл – орталық пен батыс аймақтарды тікелей жалғайтын бірегей жоба. Трассаның ұзындығы 900 шақырымға жуықтайды. Онда тәулігіне үш мыңдай көлік өтуі мүмкін. Ең бастысы – «Батыс Қытай - Батыс Еуропа» дәлізіне қосылатын жолдың арқасында арадағы қашықтық 560 шақырымға дейін қысқарады. Жобаға 1 трлн теңгегеден астам қаражат қарастырылып отыр. Көлік министрлігінің мәліметіне сүйенсек, биыл жөндеу және жаңадан салу жобаларын қоса алғанда, барлығы 11 мың шақырым жолда құрылыс жұмыстары жүргізіледі.

Мақсат Қалиақпаров, ҚР көлік вице-министрі:

- 2,3 мың шақырым құрылыс және реконструкциялау жұмыстарына, 5 мың шақырым күрделі және орташа жөндеуге, ал тағы 4 мың шақырымды жергілікті маңызы бар жол желісін дамыту жобаларында бағытталады.

Цифрлық активтерге басымдық беріледі

Экономиканың барлық саласына цифрлық технологияның енгізілуі де елдің бәсекеге қабілетін арттыратын фактор болуға тиіс. Бұл жерде цифрлық активтер индустриясы мен блокчейн технологиясын дамыту маңызды рөл атқарады. Цифрлық активтердің заңды айналымын қамтамасыз ету, криптоайырбастау қызметін жүргізу және цифрлық майнингке инвестиция тарту үшін тиісті шаралар қабылданып жатыр.