Білім сапасын талқылады

Өткен аптада Nazarbayev University-де «Жоғары білім сапасын қамтамасыз ету: қазіргі жағдайы мен даму келешегі» атты форум өтті. Оны аталған жоғары оқу орны мен Ғылым және жоғары білім министр­лігі Ғылым және жоға­ры білім саласындағы сапаны қам­тама­сыз ету комитеті бірлесіп өт­кізді.

Екі күнге созылған жиынға еліміздегі жоғары оқу орын­да­рының ректорлары мен проректорлары, мемлекеттік органдардың өкілдері қатысты.

Форумның алғашқы күні «QAA», «ASIIN» және «IAAR» халықаралық аккредиттеу агент­тік сарапшыларының қатысуы­мен шебер­лік сағаттары ұйым­дас­тырылды. Онда қатысушылар университеттерді халық­аралық аккредиттеуге дайындау, cапа мәдение­тін қалыптастыру және білім қыз­метінің экспортын дамыту мәселелерін талқылады.

Ал екінші күні – докто­рант­тардың зерттеу қызметі нәтижесінің сапасын бағалаудың жаңа тәсілі мен жоғары және жоғары оқу орнынан кейінгі білім беру ұйымдарында сапаны қамтамасыз етудің ішкі жүйелерін дамыту сөз болды. Сонымен қатар қатысушылар тақы­рыптық сессияларға бөлі­ніп, жоғары және жоғары оқу орнынан кейінгі білім саласын реттеу және рұқсат беру саясатын сараптады.

Форумның басты оқиғасы – жоғары білім мен ғылымның сапасын қамтамасыз ету жүйесінің қазіргі жағдайы мен даму келешегіне, сондай-ақ заманауи техно­ло­гия­лық және нормативтік өзгерістердің жо­ға­ры және жоғары оқу орнынан кейінгі білім саласына арналған пленарлық отырыс болды. Бұған Ғылым және жоғары білім министрі Саясат Нұрбек қатысып, отандық жоға­ры білімнің сапасы мен дамуы жайында салмақты сөз өрбітті.

Жиын барысында жоғары білімдегі сапаны қам­та­ма­сыз ету бойынша әлемдегі жетекші органның бірі – «Quality Assurance Agency for Higher Education» агенттігінің (QAA) өкілі Nazarbayev University-дің Жоғары білім мектебіне QAA-дің халық­аралық бағдарламасын аккре­диттеу сертификатын табыс етті. Бұл Жоғары білім  мектебінің үш академиялық бағдарламаның сәтті өтуі нәти­жесінде берілді. Дәлірек айт­­­­қанда, бірінші – көптілді білім бойынша магистрлік бағдарлама (MA), екінші – білім­дегі көшбасшылығы бойынша магистрлік бағ­дарлама (MSc), үшіншісі  білім саласы бойынша PhD халықаралық талап­тарға сай деп танылды.

Осы ретте NU президенті, профессор Вакар Ахмад аталған жоғары оқу орны білім сапасын қамтамасыз ету мәдениетін дамытуда қозғаушы күш ретіндегі рөлін берік ұстанатынын жет­кізді.

«Академиялық адалдық пен академиялық еркіндік университет мақсатының негізі өзегі болып қалады. Сондай-ақ жасанды интеллект пен цифрлық технологияның маңызы ал­да­ғы уақытта арта түседі. Ал ғы­лыми зерттеулер оқу үдерісімен бұрынғыдан да тығыз ықпалдасады. «Times Higher Education» (THE) 2025 жаһандық рейтингінде «Білім» бағыты бойынша әлемнің үздік 200 жоғары оқу орны қатарына енген NU Жоғары білім мектебі еліміздегі университеттермен бір­лесіп, білім мен ғылыми зерттеулердің сапа стандартын көтеру бағытында жұмыс істеп келеді», деді ол.

Жиын қорытындысында қатысу­шылар сапаны қамта­масыз ету тетігін одан әрі дамы­тып, халықаралық ынтымақ­тас­тық­ты кеңейтіп, жоғары және жоғары оқу орнынан кейінгі білімнің ұлттық жүйесіне үздік шетелдік тәжірибелерді енгізу қажеттігін айтты.

Соңғы жаңалықтар

Астанадағы бұқаралық шаңғы жарысына қалай қатысуға болады?

Елорда • Бүгін, 10:44

Түндегі тілсіз жау: СҚО-дағы бір ауданда екі адам өрттен қаза тапты

Төтенше жағдай • Бүгін, 10:42

Кофе неге қымбаттап барады?

Баға • Бүгін, 10:35

Теміртаудың тең жартысы жылусыз қалды

Аймақтар • Бүгін, 10:23

Жапониядағы кезектен тыс сайлау: Премьер-министр парламентті тарату туралы шешім қабылдады

Саясат • Бүгін, 10:17

Полиция дерегі: Алаяқтардың арбауына көбінде кімдер ілінеді?

Аймақтар • Бүгін, 10:04

Әлімханұлына қатысты допинг дауы: Қайта тыңдау тағайындалды

Кәсіпқой бокс • Бүгін, 10:00

Хромтауда газ жарылды: 5 адамды күйік шалды, бір адам жансақтау бөлімінде жатыр

Төтенше жағдай • Бүгін, 09:50

Болгария президенті қызметінен кететінін мәлімдеді

Саясат • Бүгін, 09:43

Жаңа салық режимі: Кәсіпкерлер нені ескеруі тиіс?

Бизнес • Бүгін, 09:34

«Манчестер Ситиде» ұзақ жылдар бойы топ деңгейдегі қорғаушы болады: Гвардиола өзбек футболшысы туралы

Футбол • Бүгін, 09:24

Термо шам

Ғалам ғажаптары • Бүгін, 09:18

Қар жауып, бұрқасын соғады: 20 қаңтарға арналған ауа райы болжамы

Ауа райы • Бүгін, 09:17

Face ID қалай пайда болды?

Ғалам ғажаптары • Бүгін, 09:15

Жарыс күнделігі

Спорт • Бүгін, 09:12

Барлық жаңалықтар