Бір клиникада тағы бір трагедия: Астанада әйел операциядан кейін көз жұмды

Астанадағы жеке клиникада мұрын қалқасын түзету бойынша жоспарлы операциядан кейін 59 жастағы әйел көз жұмды, - деп хабарлайды Tengrinews.kz тілшісі.

Астанадағы жеке клиникада мұрын қалқасын түзету бойынша жоспарлы операциядан кейін 59 жастағы әйел көз жұмды, - деп хабарлайды Tengrinews.kz тілшісі.

Ақтаудың 59 жастағы тұрғыны 2025 жылғы 3 маусымда септоринопластика бойынша жоспарлы операциядан кейін қайтыс болған. Марқұмның ұлының айтуынша, анасының тыныс алуы қиындап, хирургиялық көмек қажет болған.

Оның айтуынша, операцияны бұған дейін 22 жастағы қызға риносептопластика жасаған сол дәрігер жүргізген. Бұған дейін ол қыз алты айлық комаға түскені айтылған еді.

Марқұмның ұлы дәрігерді кәсіби міндеттерін тиісті деңгейде орындамау дерегі бойынша қылмыстық жауапкершілікке тартуды талап етіп отыр.

Денсаулық сақтау министрлігінің Медициналық және фармацевтикалық бақылау комитеті департаментінде 2025 жылғы 10–16 шілде аралығында жеке клиникаға жоспардан тыс тексеру жүргізілгені хабарланды.

3 маусымда операция өткізілген кезде клиниканың медициналық қызмет көрсетуге лицензиясы болмаған.

"2025 жылғы 20 наурыздан 3 маусымға дейінгі кезеңде жүргізілген консультациялар мен операциялар кезінде "Medina Plastic Surgery" ЖШС-де мына мамандықтар бойынша медициналық қызметке мемлекеттік лицензия болмаған: пластикалық хирургия, анестезиология және реаниматология, нейрохирургия, ересектерге стационарлық көмек көрсету", - делінген ведомство хабарламасында.

Клиника мемлекеттік лицензияны тек 2025 жылғы 17 маусымда, яғни науқас қайтыс болғаннан кейін ғана алған.

"Пациентке сапасыз медициналық көмек көрсету дерегі бойынша өтініш лицензия берілгеннен кейін, 2025 жылғы 3 шілдеде департаментке түсті. Осылайша, департамент пациенттің өлімі туралы өтініш түскенге дейін хабардар болмаған", - делінген хабарламада.

Кейін департамент 2025 жылғы 28 тамызда "Medina Plastic Surgery" ЖШС-нің лицензиясының күшін жойды.

Тексеру нәтижелері бойынша, материалдар құқықтық баға беру және іс жүргізу шешімін қабылдау үшін Астана Полиция департаментіне жіберілген.

Еске салайық, бұған дейін Астанадағы жеке клиникада риносептопластикадан кейін алты ай комада жатқан 22 жастағы қыз туралы жазғанбыз. Медициналық қызметті тиісінше көрсетпеу дерегі бойынша қылмыстық іс қозғалған болатын.

Сілтемесіз жаңалық оқисыз ба? Онда Telegram желісінде парақшамызға тіркеліңіз!