Биыл елде 13 мың шақырым автожол жөнделуге тиіс

Биыл елде 13 мың шақырым автожол жөнделуге тиіс. Бірақ осы жол сапасы жақсарған сайын жолаушылардың қауіпсіздігі де басты мәселелердің біріне айналып барады. 

Яғни тақтайдай тегіс жолмен зулап, жылдамдықты асыратындар көп. Биыл 9 айда елде 26 мыңнан астам жол-көлік оқиғасы тіркелді. Салдарынан 1 700-ге жуық адам опат болып, 35 мыңнан астамы жарақат алды. Дегенмен, Ішкі істер министрлігі тиіс шараларды қолға алған. Мәселен, күрежолдардағы орташа жылдамдық өлшеу құрылғысы өз жемісін бере бастады дейді мамандар. 

Ақтоты Боранова, ҚР ІІМ Әкімшілік полиция комитетінің ерекше тапсырмалар жөніндегі аға инспекторы:

Адам шығынымен болатын апаттардың санын азайту мақсатында Ішкі істер министрлігі, естеріңізде болса, орташа жылдамдық ұғымын енгізген болатын. Яғни орташа жылдамдық ұғымын енгізген учаскелерде адам шығыны 11 пайызға төмендеген. Сол үшін осы орташа жылдамдықты есептеу қазіргі таңда басқа да түзу сызықты жол учаскелерінде қосу қарастырылып жатыр. 

Өлшеу құрылғыларын көбейтумен қатар рейдтік іс-шаралар жиі өтіп тұрады. Таяудағы рейд барысында 13,6 мың мәрте жол ережесі бұзылғаны анықталды. Оның ішінде мыңнан астам жүргізуші жолаушы мен жүк тасымалдау ережесін бұзған. Сондай-ақ 394 заңсыз тасымалдау дерегі тіркелсе, 2 мыңға жуық көліктің техникалық байқаудан өтпегені немесе техникалық талаптарға сай келмейтіні белгілі болды. Бұлар көбіне такси жүргізушілері. 

Полицейлер оң рульді көліктерге ерекше назар аударған. Осы орайда олардың 213 рет қарсы жолға шыққаны анықталды. Бұдан бөлек, 268 жүргізуші көлікті мас күйінде жүргізсе, 2 506 жүргізуші рульде келе жатып телефонмен сөйлескен.