Биыл елімізде 12,9 млн шаршы метр тұрғын үй пайдалануға берілді

Қазақстанда тұрғын үй құрылысы мен инфрақұрылымдық жобалардың көлемі өсіп келеді. Бұл туралы Үкімет отырысында Ұлттық экономика вице-министрі Азамат Әмрин мәлімдеді. Оның айтуынша, 2025 жылдың 9 айының қорытындысы бойынша құрылыс саласы 14,9%-ға ұлғайған, деп хабарлайды Egemen.kz.

Фото: istockphoto.com

Азамат Әмриннің сөзінше, өсім еліміздің барлық өңірлерінде дерлік байқалған. Ең жоғары көрсеткіштер Астана қаласында – 41,8%, Алматыда – 37,7%, Солтүстік Қазақстан облысында – 27,3%, Ақмола облысында – 26,4%, ал Түркістан облысында – 25,5% деңгейінде тіркелді.

Вице-министр сондай-ақ биыл 12,9 миллион шаршы метр тұрғын үй пайдалануға берілгенін хабарлады. Бұл өткен жылдың осы кезеңімен салыстырғанда 3,4%-ға артық.

Министрлік деректері бойынша, тұрғын үй құрылысы қарқыны жоғарылаған өңірлердің қатарында Ұлытау облысы (өсім 24,6%), Алматы облысы (16%), Түркістан облысы (8,4%) және Жетісу облысы (9%) бар. Сондай-ақ Алматы қаласында да құрылыс көлемі айтарлықтай артқан – 18,2%-ға өскен.