Биыл шалғай жайылымдарда 200 шаруашылық құрылады

АЛМАТЫ, 21 қаңтар – Sputnik. Был шалғай жайылымдардағы мал шаруашылығына маманданған 200 шаруашылық құрылады. Бұл туралы парламент сенатында өткен отырыс барысында ауыл шаруашылығы вице-министрі Аманғали Бердалин мәлімдеді.

19 қаңтарда үкімет мал шаруашылығын дамытудың кешенді жоспары жобасын мақұлдады.

"Министрлік мал шаруашылығын дамытудың кешенді жоспарын әзірледі. Құжатта жеңілдетілген несиелеу, асыл тұқымды мал шаруашылығын және ғылыми қамтамасыз етуді дамыту, азықтық базаны нығайту шаралары бар. Сондай-ақ ветеринариялық қауіпсіздікті арттыру, саланың инвестициялық тартымдылығын күшейту, заманауи технологияларды енгізу және экспорттық әлеуетті кеңейту жөніндегі ынталандыру шаралары көзделген", — деді Аманғали Бердалин.

Негізгі бағыт – қолжетімді жеңілдетілген кредиттерді енгізу. Жоғары өнімді мал басын сатып алу үшін жылдық 6% мөлшерлемемен ұзақ мерзімді жеңілдетілген кредит беру бағдарламасын іске асыру жоспарлануда.

Жайылым инфрақұрылымын дамытуға арналған бірыңғай кредиттік өнім іске қосылады. Ол жайылымдарды суландыруды және мобильді қоныстарды сатып алуды қамтиды. Нәтижесінде 2026 жылы шалғай жайылымдардағы мал шаруашылығына маманданған 200 шаруашылық құру жоспарланып отыр.