Биыл Ұлттық банк депозит мөлшерлемелерін реттеу саясатын жетілдіреді

— Жүргізіліп жатқан ақша-кредит саясаты теңгедегі активтерге деген сенімді сақтауда. Депозиттер 16,3 проценттің өсім көрсетіп, 48 трлн теңгеге жетті. Долларлану деңгейі 21 процент болып, тарихи минимумда қалыптасты, — деді Ұлттық банк басшысы. 

Сондай-ақ, ол мерзімді депозиттердің көлемі 14 есе, ал жинақ депозиттер 1,5 есе өскенін атап өтті.

— Осы депозиттер банктердің экономиканы кредиттеуіне тұрақты қаржыландыру базасын ұлғайтады. Биыл депозит нарығындағы мөлшерлемелерді реттеуді жетілдіреміз. Бұл банктер арасындағы бәсекелестікті арттыруға және қаржылық қызметтердің сапасын жақсартуға ықпал етеді, — деді Тимур Сүлейменов.

Айта кетейік, бүгін Мемлекет басшысы Қасым-Жомарт Тоқаевтың төрағалығымен Үкіметтің кеңейтілген отырысы өтіп жатыр. Жиында елдің 2025 жылғы әлеуметтік-экономикалық дамуы қорытындыланып, Үкіметтің алдағы кезеңге арналған негізгі міндеттері айқындалады.