“Біз де дайын болуымыз керек“ Бектенов дрондар мен ұшу аппараттарының іске қосылуы туралы

Қазақстан әуе таксиі, дрондар мен ұшу аппараттарының басқа да жаңа түрлерін іске қосуға дайындалуы тиіс. Бұл туралы үкімет отырысында премьер-министр Олжас Бектенов мәлімдеді, деп хабарлайды Tengri Travel.

Қазақстан әуе таксиі, дрондар мен ұшу аппараттарының басқа да жаңа түрлерін іске қосуға дайындалуы тиіс. Бұл туралы үкімет отырысында премьер-министр Олжас Бектенов мәлімдеді, деп хабарлайды Tengri Travel.

Премьер-министр Көлік министрлігіне жыл соңына дейін Азаматтық авиацияны дамытудың 2050 жылға дейінгі мастер-жоспарын (CAMP-2050) бекіту бойынша шаралар қабылдауды тапсырды.

Бектеновтің айтуынша, құжатта шағын және өңірлік авиацияны, ұшқышсыз әуе көлігін дамыту, сондай-ақ жаңа баламалы отынды пайдалану мен сақтаудың озық технологияларын енгізу жөніндегі шаралар міндетті түрде қарастырылуы тиіс.

Сондай-ақ ол әлемдік авиациялық реттеушілер әуе көлігінің жаңа түрлерінің пайда болуына қазірдің өзінде дайындалып жатқанын атап өтті.

"Еуропадағы EASA және АҚШ-тағы FAA сияқты әлемдік реттеушілер әуе таксиінің коммерциялық аппараттарын сертификаттау ережелерін әзірлеп қойды. Біз де әуе таксиі, дрондар мен ұшу аппараттарының басқа да жаңа түрлерін іске қосуға дайын болуымыз керек", - деді премьер-министр.

Осыған байланысты Бектенов Көлік министрлігіне биыл маусым айының соңына дейін қалалық әуе мобильділігі (UAM) мәселелері бойынша қажетті заңнамалық түзетулердің қабылдануын қамтамасыз етуді тапсырды.

Бұған дейін Қазақстанның тек ұшқышсыз көлік үшін ғана емес, әуе таксиі үшін де заңнамалық база дайындап жатқаны туралы жазған едік. 2025 жылғы желтоқсанда Көлік министрі Нұрлан Сауранбаев e-Joldar жүйесі аясында жолдардың цифрлық паспорттары қалыптасып жатқанын, бұл болашақта ұшқышсыз автокөліктерді енгізуге мүмкіндік беретінін айтқан еді. Сол кезде ол заң жобасы ұшқышсыз таксилер мен әуе таксилеріне де қатысты болатынын мәлімдеген.

2026 жылғы наурызда үкіметте ұшқышсыз автокөліктердің эксперименттік жобасын және жеткізуші дрондарды іске қосу жоспарлары туралы хабарланды. Премьер-министрдің орынбасары - Жасанды интеллект және цифрлық даму министрі Жаслан Мәдиевтің айтуынша, ұшқышсыз көліктер бойынша пилоттық жобаны іске асыру мерзімі - 2026 жылдың екінші тоқсаны.

Кейінірек бірінші кезеңде ұшқышсыз таксидің сынақ жобасы Астана, Алматы және Қосшы қалаларында іске қосу жоспарланып отырғаны хабарланды. Ол үшін жол инфрақұрылымы, цифрлық карталар, белгілер, таңбалар және қауіпсіздік талаптары тексерілуі тиіс.

Google News арқылы жаңалықтарымызды қадағалаңыз