Блогер Жанәбіловтер отбасы үйқамаққа алынды

Қаржылық мониторинг агенттігінің (ҚМА) елордалық департаменті блогерлер Ерболат Жанәбілов пен Эльмира Төлегеноваға қатысты заңсыз кәсіпкерлік және қылмыстық жолмен алынған ақшаны заңдастыру дерегі бойынша тергеуді аяқтағандарын мәлімдеді, деп хабарлайды Arasha.kz.

Тергеу нұсқасы бойынша, Instagram-да 15 миллионнан астам оқырманы бар ерлі-зайыптылар халықтың сенімін заңсыз табыс табу мақсатында пайдаланған. 2025 жылы олар онлайн-курстарды сату желеуімен заңсыз схема ұйымдастырған. Бұл ретте адамдардың «курстарды» сатып алуына білім алу емес, бағалы сыйлықтар ұтысына қатысу ниеті негізгі себеп болған.

Бейнематериалдардың ешқандай білім беру құндылығы болмаған, олардың басым бөлігі YouTube сияқты ашық дереккөздерден алынған және тек лицензияланбаған лотереяны бүркемелеу үшін ғана пайдаланылған.

Сыйлық қоры, жарияланғандай, жеке қаражат есебінен емес, қатысушылардан курстар үшін төлем ретінде жиналған ақшадан құралған. Электронды «сәттілік барабанының» параметрлері қолдан өзгертілгені анықталды: онда 5 000 теңге ұту ықтималдығы жасанды түрде арттырылып, ал құнды сыйлықтарды ұтып алу мүмкіндігі айтарлықтай төмендетілген.

Көпшілікті қызықтыру үшін күдіктілер ең көп репост жасаған қатысушыға 11-ші автокөлікті сыйға беретінін айтып, жалған мәлімдеме жасаған. Іс жүзінде жеңімпаз анықталмаған және автокөлік ешкімге берілмеген.

Нәтижесінде «Zhana Business» ЖШС-не азаматтардан 247,5 млн теңге түскен, оның 60 млн теңгесі депозиттік шоттарға аударылған.

Сот санкциясымен Lamborghini Urus және Lexus LX 600 сияқты 10 автокөлік пен 17 дана iPhone телефонына арест қойылды.

Күдіктілерге қатысты «үйқамақ» бұлтартпау шарасы таңдалды. Қазіргі уақытта олар іс материалдарымен танысуға көшті.