Бұдан былай шығармашылық өкілдерінің туындылары бірыңғай цифрлық платформада жинақталады

«Атамекен» ҰКП жанындағы Мәдениет және креативтік индустриялар жөніндегі кішікомитеттің алаңында зияткерлік меншікке қатысты қабылданған түзетулердің негізгі тетіктері жария етілді. Жиынға Сенат пен Мәжіліс депутаттары, Әділет министрлігінің өкілдері және Кәсіпкерлер палатасы қатысты, деп жазады Egemen.kz.

Фото: gov.kz

Басты жаңалық – ұжымдық құқықтарды басқаруға арналған Бірыңғай цифрлық платформа. Жаңа жүйе авторлық шығармалардың пайдаланылуын, келісімшарттар мен сыйақы төлемдерін бір орталыққа жинақтап, ашық әрі қолайлы тетік қалыптастырмақ.

Әділет вице-министрі Ботагөз Жақселекованың айтуынша, бұл қадам шығармашылық иелеріне тиесілі сыйақының әділ жиналуына және уақтылы бөлінуіне жол ашады.

Кездесуге креативтік индустрия, өңірлік палаталар, театрлар, филармониялар, авторлар мен кәсіпкерлерден құралған 200-ден астам қатысушы келіп, жаңа платформаның жұмыс механизмін талқылады. Қатысушылар цифрландырудың енгізілуі саладағы ашықтықты күшейтіп, шығармашылық ортаға сенімділік пен тиімділік қоса түсетінін атап өтті.