Бұл жылқы менікі емес : адвокат екі адамның өліміне себеп болған жауапсыздық туралы айтты

2025 жылғы 12 маусымда Астана – Ерейментау – Шідерті тасжолында ауыр жол-көлік оқиғасы болып, екі адам қаза тапты, – деп хабарлайды Aikyn.kz сайты. 

Subaru көлігі толықтай жанып кетті, ал Kia көлігі жарамсыз күйге түсті.

Себеп – жолға шығып кеткен жылқы. Бірақ бұл іс тек жол қауіпсіздігі мәселесімен шектелмей, жауапкершіліктен қашу, шындықты жасыру және қоғамды әуре-сарсаңға салу мысалына айналды.

Бұл туралы адвокат Әлімжан Жұбатқанов айтты.

Оқиғаға себеп болған сары қасқа, «К» таңбасы бар жылқының иесі Н. алғашқы күннен бастап:«Бұл жылқы менікі емес» деп, кінәні Ж. азаматқа аударуға тырысты. Сонымен қатар, жәбірленушілерге материалдық және моральдық шығындарды өндіру әрекетінен жалтару мақсатында осындай қадамдарға барған. Н. өз жылқысына таңбаны қояр кезінде кездейсоқ Ж. азаматтың таңбасын басқан. Алайда Н. бұл қателікті мойындамады, куәгерлер көргенін айтып, Н.-ның өз жылқысына дұрыс таңбаны қоя алмай, басқа адамның таңбасын қолданғанын дәлелдеді.

Бастапқыда іс әкімшілік құқық бұзушылық құрамы жоқ деп тоқтатылды. Бірақ бұл сонымен бітпеді. Жаңадан ашылған мән-жайлар: куәгерлердің жаңа айғақтары, бейнежазбалар, аудиожазба, қаржылық төлемдер, ветеринарлық деректер – істі қайта қарауға мәжбүр етті.

Нәтижесінде сот Н.-ның кінәсін толық дәлелденген деп таныды.15 қаңтарда Ақмола облыстық сот алқасының қарауымен, Ерейментау аудандық соты Н.-ның шағымын қанағаттандырусыз қалдырып, қаулыны өзгеріссіз қалдырды.

Н.-ның «Бұл жылқы менікі емес» деген бір ауыз сөзі: полиция қызметкерлерін қайта-қайта материал жинауға, куәларды бірнеше мәрте сотқа шақыруға, жәбірленуші тарапты айлар бойы сабылтуға алып келді.

Яғни бір адамның жауапкершіліктен қашуы тұтас қоғамды сарсаңға салды.

Сот нәтижесінде: ӘҚБтК-нің 408-бабы 2-бөлігі бойынша Н.-ға қатысты қаулы өзгеріссіз қалдырылды

Ең өкініштісі – екі адам қаза тапқан ауыр оқиғадан кейін де, өз малы үшін жауап берудің орнына, шындықтан қашып, кінәні басқаға аударуға тырысу. Сонымен бірге, істі ашып, нақты анықтау және барлық дәлелдемелерді сотқа жеткізу – жоғары деңгейдегі заңгерлік және тергеушілік жұмыс болып саналады. Мал ұстау – тек шаруашылық емес. Бұл – адам өмірі алдындағы заңды және адамдық жауапкершілік.