Business Media Central Asia Қазақстанның көрме индустриясындағы жаңа жобаларын таныстырды

Астанада 2026 жылдың іскерлік бағытын айқындайтын және Қазақстанның Орталық Азиядағы көрме индустриясындағы жетекші орнын нығайтатын басты халықаралық көрмелердің тұсаукесері өтті, - деп хабарлайды Aikyn.kz.

Business Media Central Asia – Германияның Messe Frankfurt компаниясының Қазақстандағы ресми өкілі. Бүгінге дейін Еуропа, Азия және ТМД елдерінен мыңнан астам компанияны біріктірген 20-дан астам ауқымды халықаралық жобаны сәтті жүзеге асырды. Бүгінде компания ұйымдастыратын көрме алаңдары кәсіби қауымдастықтар, инвесторлар мен стратегиялық серіктестер үшін тартылыс нүктесіне айналып отыр.

«Қазақстан бүгінде халықаралық көрмелер мен іскерлік іс-шараларды өткізудің жетекші орталықтарының бірі ретінде өз позициясын қарқынды нығайтып келеді. Біз жүзеге асырып жатқан жобалар еліміздің өндірістік қуаты мен инновациялық мүмкіндіктерін айқын көрсетіп, жаңа серіктестік бағыттарына жол ашады. Алдағы уақытта да салалық қауымдастықтармен бірлесе отырып, кәсіби  диалог пен ынтымақтастықтың тиімді алаңдарын дамытуды жалғастырамыз», – деді BMCA Қазақстанның директоры Әнуар Мәлік.

2026 жылдың жаңа жобалары

Comtrux Astana 2026

Comtrux Astana – Komtrans+ BUSexpo Astana көрмесінің ребрендингі нәтижесінде пайда болған жаңа бренд. Жоба Қазақстан мен Орталық Азиядағы коммерциялық көлік саласын жаңа деңгейге шығарып, қатысушылар ауқымын кеңейтуге және әлемдік деңгейдегі серіктестерді тартуға бағытталған. Көрме 2026 жылғы 5–7 мамыр аралығында өтеді. Іс-шара Eurasian Construction Technology Astana көрмесімен қатар ұйымдастырылып, көлік пен құрылыс салаларының бір алаңда тоғысуы арқылы арқылы іскерлік өзара іс-қимылдың тиімділігін арттыра түседі.

Қазақстанның автомобиль индустриясы тұрақты түрде өсіп келеді. Автомобиль нарығын талдау және мониторинг жасау агенттігінің мәліметінше, 2024 жылы елде 205 мыңнан астам жаңа автокөлік сатылған. Бұл көрсеткіш 2023 жылмен салыстырғанда 3%-ға жоғары. Ал 2025 жылдың алғашқы сегіз айының қорытындысы бойынша сатылым көлемі 143 мың бірлікті құрап, макроэкономикалық факторларға қарамастан нарықтың оң динамикасын сақтап отыр.

Өндіріс секторы да тұрақты өсім көрсетіп отыр: аталған кезеңде 1,34 трлн теңге көлемінде 96 мыңнан астам көлік құралы шығарылған. Негізгі өндіріс көлемі Allur және Hyundai Trans Kazakhstan зауыттарына тиесілі – олар елдегі жалпы автокөлік өндірісінің 90%-дан астамын қамтамасыз етеді.

Сонымен қатар, автокөлік импорты да өсіп келеді. Нарықтағы жетекші елдер қатарында Қытай, АҚШ және Жапония бар, ал қытайлық брендтердің үлесі ішкі нарықтағы жаңа көліктер сатылымының үштен бірінен асып түсті.

Бұл көрсеткіштер Қазақстанның автоөндіріс саласының жоғары әлеуетін дәлелдей отырып, коммерциялық көлік индустриясын дамытуға берік негіз қалыптастырады. Дәл осы миссияны жүзеге асыруды Comtrux Astana көрме алаңы өз мойнына алады.

Automechanika Astana 2026

Қазақстан мен Каспий аймағындағы автокөлікке арналған қосалқы бөлшектер, автокомпоненттер және сервистік жабдықтар бойынша ең ірі көрме.

2026 жылдың 10–12 маусымы аралығында өтетін іс-шара аясында автонарықтың жетекші өндірушілері, дистрибьюторлары және салалық сарапшылары қайта бас қосып, саладағы заманауи шешімдер мен жаңа үрдістерді ұсынады.

PROFOOD Astana 2026

Нан өнімдері, кондитерлік, ет, сүт және кофе өнеркәсіптеріне арналған жабдықтар, технологиялар мен ингредиенттердің халықаралық көрмесі 2026 жылдың 9–11 қыркүйегі аралығында өтеді.

Жоба кең форматтағы азық-түлік көрмелері мен мамандандырылған экспозициялар арасындағы аралықты толықтырып, жаңа алаң ұсынуды мақсат етеді. PROFOOD Astana тағам өндірісінің өндірушілерін, өңдеушілерін, жеткізушілерін және HoReCa секторының өкілдерін біріктіріп, тамақ өнеркәсібі мен оған іргелес нарықтардағы жаңғырту мен инвестициялардың негізгі қозғаушы күшіне айналуды көздейді.

Intelligent Building Expo Astana 2026

Қазақстанда алғаш рет өтетін ақылды ғимараттар, инженерлік жүйелер және қалалық технологиялар саласындағы шешімдерді біріктіретін көрме. Іс-шара 2026 жылдың 9-11 қыркүйегі аралығында Халықаралық «EXPO» көрме орталығында өтеді. Көрме Messe Frankfurt компаниясының қолдауымен ұйымдастырылады. Бұл компания Light + Building, ISH және Intersec сияқты әлемге әйгілі жобалардың ұйымдастырушысы ретінде танымал.

Intelligent Building Expo Astana – Interlight Central Asia жобасының негізінде қалыптасқан жаңа формат. Ол жарықтандыру мен дизайн бағытын кеңейтіп, қазіргі заманғы Smart Building және Smart City технологияларына басымдық береді.

«Көрмелер халықаралық ынтымақтастықтың ең тиімді тетіктерінің бірі болып қала береді. Біздің басты мақсатымыз – еуразиялық әріптестікті кеңейтіп, жаңа нарықтарға жол ашу. Бұл үдерісте Қазақстан аймақтық хаб ретінде ерекше орынға ие», – деп атап өтті BMCA директорлар кеңесінің мүшесі Ойген Аллес.

Business Media Central Asia іскерлік ынтымақтастық пен тәжірибе алмасуға арналған тұрақты алаңдарды қалыптастыруды жалғастырып келеді. Компанияның бастамалары ел экономикасының өсуіне серпін беріп, Қазақстанның әлемдік көрме картасындағы орнын нығайтуға үлес қосуда.