Чемпиондар лигасы: Қайрат бүгін Интерді жеңе ала ма?

Бүгін алматылық «Қайрат» командасы Чемпиондар лигасының жалпы кезеңі аясында миландық «Интерге» қарсы матч өткізеді. Ойын қарашаның 5-інен 6-сына қараған түні, Астана уақытымен 01:00-де басталады, деп жазады Egemen.kz.

Бұған дейін «Қайрат» Алматыда мадридтік «Реалдан» 0:5 есебімен жеңіліп, одан кейін кипрлік «Пафосты» қабылдап, 0:0 есебімен тең түсті.

Өкінішке қарай, матчқа «Қайраттың» негізгі қорғаушысы Александр Мартынович қатыса алмайды.

«Бәрі де ойдағыдай, біз «Интерге» қарсы матчқа жақсы көңіл-күймен келдік. Қазақстан чемпионы атандық, енді әрі қарай алаңсыз дайындаламыз. Әрине, қарсыластың күшті екенін білеміз, бірақ бұл біздің мықты командаға қарсы деңгейімізді көрсететін тамаша мүмкіндік. «Интер» тәжірибелі команда. Италия чемпионатында екінші орында келе жатыр және чемпиондыққа таласады. Чемпиондар лигасында да жорықты жеңіліссіз жалғастырып келе жатыр. Не айтуға болады... Қиынға соғары сөзсіз, алайда біз мейлінше батыл әрі ұйымдасып ойнауымыз керек», дейді бас бапкер Рафаэль Оразбахтин.

Миландағы «Джузеппе Меацца» стадионында өтетін тарихи матчты тікелей эфирде QAZAQSTAN телеарнасынан көруге болады. Ойынға португалиялық Луиш Годинью төрелік жасайды.