Цифрлық бақылау: ​Атырауда 78 “ақылды” бағдаршам ​іске қосылды

Атырау қаласында жол қозғалысын басқарудың жаңа цифрлық жүйесі енгізіліп, «ақылды» бағдаршамдар күшейтілген режимде жұмыс істей бастады.

12 наурыздан бастап көлік ағындарын реттеу үшін жасанды интеллект элементтеріне негізделген интеллектуалды жүйе қолданысқа енгізілді.

Қазіргі таңда қалада 78 «ақылды» бағдаршам орнатылған. Оның ішінде 73-і жол қиылыстарында, ал 5-еуі жаяу жүргіншілер өткелдерінде орналасқан. Жүйе кезең-кезеңімен іске қосылып, алдымен көлік қозғалысы ең көп негізгі көшелер мен ірі қиылыстар қамтылуда.

Атырау қаласы әкімінің баспасөз хатшысы Еркеназ Қалижанның айтуынша, жаңа бағдаршамдардың басты ерекшелігі – жолдағы нақты жағдайға бейімделу мүмкіндігі. Датчиктер көлік ағынын өлшеп, бейнебақылау камералары жол ережесін бұзу деректерін тіркейді. Соның арқасында бағдаршамдар сигналдардың ұзақтығын реттеп, кептелістерді азайтуға және жол-көлік оқиғаларының алдын алуға ықпал етеді.

Арнайы қызмет көліктерінің қозғалысына да ерекше назар аударылған. Жүйе қажет болған жағдайда бағдаршам фазаларын жедел өзгертіп, жедел жәрдем, өрт сөндіру және полиция көліктерінің бөгелмей өтуіне мүмкіндік береді.

Жоба аясында қалада жалпы саны 600-ден астам бағдаршам орнату жоспарланып отыр. Қазіргі уақытта көлік пен жаяу жүргіншілер қозғалысын тиімді басқару үшін жүйеге 160 мыңнан астам дерек енгізілген.

Бұл бастама Атыраудағы жол қозғалысын қауіпсіз әрі тиімді етуге бағытталған.

Бүгін, 13:29