Цифрлық теңге Қазақстандағы ұлттық валютаның үшінші нысаны ретінде бекітілді

Қазақстанда цифрлық теңгені енгізуге арналған нормативтік-құқықтық база толық қалыптастырылып, оны одан әрі дамыту жоспары бекітілді.
Бұл туралы ҚР Қаржы вице-министрі Әсет Тұрысов Орталық коммуникациялар қызметінде өткен брифингте мәлімдеді.

Оның айтуынша, цифрлық теңге енді ұлттық валютаның қолма-қол және қолма-қолсыз түрлерімен қатар қолданылатын үшінші ресми нысан мәртебесіне ие болды.

– Бүгінде ел үшін маңызды жобалардың бірі – цифрлық теңге. Мемлекет басшысы да бұл бастаманың маңызын бірнеше рет атап өткен болатын. Қажетті нормативтік-құқықтық қамтамасыз ету қабылданды. Ресми түрде цифрлық теңге Қазақстандағы ұлттық валютаның үшінші нысаны болып бекітілді, – деді Әсет Тұрысов.

Вице-министрдің мәліметінше, қазіргі таңда айналымға 339 миллиард теңгеге жуық цифрлық валюта шығарылған. Сонымен қатар жоба аясында 20-дан астам пилоттық бастама іске асырылды. Олардың қатарында мемлекеттік сатып алулар, инфрақұрылымдық жобаларды қаржыландыру, субсидиялау тетіктері және салықтық әкімшілендіру жүйелері бар.

Қазір Ұлттық банк пен Үкімет цифрлық теңгені қолдану аясын кезең-кезеңімен кеңейту жұмыстарын жүргізіп жатыр. Осы мақсатта жобаны ауқымды түрде енгізуге арналған сегіз негізгі бюджеттік бағыт айқындалған.

Мамандардың пікірінше, цифрлық теңге мемлекеттік қаржының қозғалысын бақылауды күшейтіп, бюджет қаражатының ашық әрі мақсатты жұмсалуына мүмкіндік береді. Сондай-ақ бұл құрал қаржы операцияларының тиімділігін арттырып, цифрлық экономиканы дамытуға серпін бермек.

Сарапшылардың бағалауынша, цифрлық теңгені кеңінен енгізу мемлекеттік шығындардың ашықтығын қамтамасыз етіп қана қоймай, көлеңкелі экономиканы қысқартуға және қаржылық бақылау тетіктерін жетілдіруге ықпал етеді.