ДДҰ: Кальянды темекінің қауіпсіз баламасы ретінде қабылдауға болмайды

Фото: istockphoto.com

ДДҰ экономикалық өсімнің, кәсіпкерлікті қолдаудың және жаңа жұмыс орындарын ашуды қолдайтынын жеткізді. Дегенмен темекі өнімдерін реттеу мәселесінде басты назар халық денсаулығын қорғауға аударылуы қажет екенін ескертті.

ДДҰ кальянның жастар арасында кеңінен таралуына да алаңдаушылық білдірді. Ұйымның пікірінше, хош иістендірілген темекі, әлеуметтік желілердегі жарнама және кальян мәдениетінің демалыс түрі ретінде насихатталуы жастардың никотин өнімдерін тұтынуына ықпал етеді.

Статистика: Ел тұрғындары темекі мен алкогольге кететін шығынды азайтқан

Қазақстандағы ДДҰ өкілі Скендер Сыланың айтуынша, кальянды темекінің қауіпсіз баламасы ретінде қабылдауға болмайды.

«Көпшілік кальянды темекіге қарағанда қауіпсіз балама деп қате қабылдайды. Алайда кальян – темекі өнімі, ал ғылыми дәлелдер оның түтінінде көміртек тотығы, ауыр металдар және полициклді ароматты көмірсутектер сияқты улы әрі қатерлі ісік тудыратын заттардың бар екенін анық көрсетеді», деді ол.

Сондай-ақ ДДҰ Қазақстанның темекіге қарсы саясаттағы көшбасшылығын жоғары бағалап, халық денсаулығын қорғау бағытындағы жұмыстарға қолдау көрсетуге дайын екенін мәлімдеді.

Еске сала кетейік, Қаржы министрлігінде елдегі кальян мекемелерінің қызметін реттеу мәселелеріне арналған заң жобасы қаралып жатыр. Үкімет өкілдерінің айтуынша, қоғамдық тамақтану саласында көлеңкелі нарықтың кең таралуына байланысты темекі өнімдеріне қойылған тыйым күткен нәтижесін бермей отыр.