Депозит ашуда кенже қалған елдер

Қаржы саласы ел экономикасының күретамыры.

Алайда әлемнің кейбір елдерінде бұл сала, нақтырақ айтқанда депозит ашу мәселесі әлі де дамудың бастапқы кезеңінде. Бұл бағытта кенжелеп қалған елдер қандай? Ұлттық валютаның құнсыздануына не себеп? 

Конго Демократиялық Республикасы 

Қаржы саласында кенжелеп қалған елдің бірі Конго Демократиялық Республикасы. Онда 80 миллионнан астам халықтың көбі ресми банктік жүйеге қосылмаған. Кей аймақтарда тіпті ұлттық валютаға деген сенім төмен. Соның салдарынан депозиттер АҚШ долларымен ашылады. Ел ішінде конголық франктан гөрі шетел валютасы – доллар көбірек қолданылады. Дегенмен, жағдай біртіндеп өзгеріп келеді. Биыл қыркүйекте Киншасада Visa Pay атты мобильді қосымша іске қосылды. Ол арқылы пайдаланушылар ұлттық валюта Конголық франкпен де, доллармен де төлем жасап, ақша аудара алады. Виртуалды карталар мен басқа да мүмкіндіктер қарастырылған.

Венесуэла 

Депозит ашу жағынан әлі де тұралап тұрған елдің қатарына Венесуэланы  жатқызуға болады. Ел бірнеше жылдан бері гиперинфляциямен күресіп келеді. Ұлттық валюта – боливар күн санап құнсызданып жатыр. Мәселен, бүгін 1000 боливарға нан алуға болатын болса, келесі аптада ол ақша түкке де жарамай қалуы мүмкін. Мұндай жағдайда халық банкте ақша ұстауды қажет деп санамайды. Бұған қоса, мемлекет тарапынан банктік шоттарды бұғаттау, шектеу қою сияқты әрекеттер де сенімге селкеу түсірген. Бұрынғы дағдарыстар кезінде салымдарын жоғалтқан халық енді қаржы орталықтарына жолағысы жоқ. Көпшілік күнделікті өмірде АҚШ долларын қолдануға көшкен. Экономикалық қиындықтарға жұмыссыздық пен кедейшілік қосылып, жағдайды одан әрі ушықтырып отыр.

Ауғанстан 

Ауғанстанда қаржы саласы тіптен қиын. Халықтың басым бөлігі  күнделікті табысын тек өмір сүруге жұмсайды, артық ақша жоқтың қасы. Ел экономикасы ауыл шаруашылығы мен сырттан келетін гуманитарлық көмектерге тәуелді. Банк саны аз, қызмет көрсету сапасы төмен. Тұрғындар банктік өнімдер мен оның пайдасы жайлы мардымды ақпарат біле бермейді. Жылдар бойғы соғыс пен тұрақсыздық банктерге деген сенімді мүлде азайтқан. Қауіпсіздік мәселесі де банктік қызметтердің қолжетімділігін шектеп отыр.

Бангладеш

Бангладеш те жинақ шоттарын ашуда артта қалған мемлекеттер тізімінде. Мұнда отбасылар тапқан табысын күнделікті қажеттілікке ғана жаратады. Ауылдық жерлерде банктер мүлде жоқ, ал қалалық аймақтарда банкке бару үшін ұзақ жол жүру керек. Халық көбіне ақшаны банкке емес, алтын, мал сияқты дәстүрлі активтерге салғанды жөн көреді. Әрі саяси тұрақсыздық пен қақтығыстар экономикалық өсімді тежейді.

Нұрбике Жігер