Астанада автобуста қызға тиісіп, әдепсіз әрекет жасаған ер адам ұсталды

Астанада қоғамдық көлікте қызға тиісіп, әдепсіз әрекет жасады деген күдікпен 46 жастағы ер адам ұсталды, – деп хабарлайды Aikyn.kz Tengrinews.kz сайтына сілтеме жасап.

Оқиға туралы жәбірленуші әлеуметтік желіде жазған. Оның айтуынша, автобуспен келе жатқанда бейтаныс ер адамның өзіне қол тигізгенін сезген. Бұрылып қарағанда оның әрекеті кездейсоқ болмағанын түсінген.

Қыз ер адамға қарсылық білдіріп, оны суретке түсіріп алған. Кейін болған жағдайды әлеуметтік желіде жариялаған.

Жәбірленуші мұндай жағдайда әйелдердің өз құқығын қорғауы қиын екенін айтып, полицияға жүгінген күннің өзінде оқиғаны дәлелдеу оңай болмайтынына алаңдаушылық білдірген.

Астана қалалық полиция департаментінің мәліметінше, аталған оқиға бойынша 46 жастағы ер адам ұсталған.

«Оған қатысты әкімшілік іс қозғалды. Ер адам уақытша ұстау бөлмесіне қамалды», – деп хабарлады полиция.