Депутат Алматы облысында шекарашылармен кездесті

Әскери қызметшілер мәртебесін көтеру бағытындағы жұмыс жалғасады. Сондай-ақ азаматтық қоғаммен байланысты нығайту мәселесі де назарда болады.

Бұл жайында Парламент Мәжілісінің Халықаралық істер, қорғаныс және қауіпсіздік комитетінің төрағасы Айгүл Құспан әскери қызметшілермен кездесуде айтты. Депутат Ұлттық қауіпсіздік комитеті Шекара қызметінің Алматы облысы Қарасай ауданы бойынша шекара басқармасының техникалық-кәсіптік даярлау бөліміне барды. Әскери бөлімнің материалдық-техникалық жабықталуымен, жеке құрамның әлеуметтік жағдайымен танысып, сарбаздармен сұхбаттасты. Әңгімелесу кезінде әскерилерді баспанамен қамту мәселесі де сөз болды.

Айгүл Құспан, ҚР Парламенті Мәжілісінің депутаты:

- Бұл жерде шекара қызметіне арналған байланысшыларды, аспазшыларды және санитарлық инструкторларды дайындайды екен. Дайындық барысымен таныстым. Әскери қызметшілердің тұрмысы бойынша көп мәселелерді талқыладық. Медициналық қамтамасыз ету, соның бәрін өзім тіркеп, жазып алдым. Орталық мемлекетік органдармен талқылайтын боламын.