Қызылорда облысында Қорғаныс министрі сарбаздармен кездесті

Қазақстан Республикасының Қорғаныс министрі, авиация генерал-лейтенанты Дәурен Қосанов Қызылорда облысына жұмыс сапары барысында өңірдегі әскери бөлімдердің жай-күйімен танысты.

Министр облыстық аумақтық қорғаныс бригадасының қызметіне үңіліп, 99215 әскери бөлімінің штаб жұмысына, жеке құрамның орналасуы мен сарбаздардың тамақтану жағдайына тексеріс жүргізді. Сондай-ақ сала басшысы күзгі әскерге шақыру науқанының қорытындысы мен запастағы әскери қызметшілерді даярлау барысын пысықтап қайтты. Жаңартылған әскери нысандарды, казарма мен асхананы аралап, сарбаздармен тілдесті. Әскери қызметшілердің әлеуметтік-тұрмыстық жағдайы, дербес барлау полкінің зымыран-артиллериялық қару-жарақ қоймасы мен жауынгерлік машиналар паркінің жағдайы да назардан тыс қалмады. Сапар нәтижесінде министр бөлімше басшылығына сарбаздардың жауынгерлік әзірлігін арттырып, қызметтік жағдайын жақсартуға қатысты бірқатар тапсырма жүктеді.