Дрондар заңсыз құрылыс нысандарын анықтау үшін қолданылады

АСТАНА, 18 желтоқсан – Sputnik. Дрондар мен жасанды интеллект Қазақстанда заңсыз құрылыс нысандарын анықтайды, деп мәлімдеді өнеркәсіп және құрылыс вице-министрі Жәннат Дүбірова үкіметтегі баспасөз мәслихатында.

Мемлекет нақты салынып жатқан құрылыс нысандарын бекітілген бас жоспарлармен салыстыра отырып тексеру үшін дрондар мен жасанды интеллект алгоритмдерін қолданатын цифрлық экожүйені енгізіп жатыр.

Негізгі құрал мемлекеттік қала құрылысы кадастрының автоматтандырылған ақпараттық жүйесі бола береді. Жүйе нақты уақыт режимінде заң бұзушылықтарды анықтауға және деректерді мемлекеттік сәулет-құрылыс инспекциясына жіберуге мүмкіндік береді.

"Осы жылдың соңында сәулеттік-жобалау тапсырмаларын беруден бастап техникалық шарттарды беруге дейінгі барлық негізгі қызметтер цифрландырылады. 2026 жылдың басында цифрлық бас жоспарларды жүзеге асыруды автоматты түрде бақылау үшін ЖИ-Co-pilot жүйесін пилоттық режимде енгізу жоспарланып отыр", — деді вице-министр.

Дүбірованың айтуынша, 2026 жылы "Smart Turmys" бірыңғай коммуналдық қызмет платформасы іске қосылады. Ол су, жылу, электр, газбен жабдықтау және қалдықтарды шығару қызметтерін "бір терезеде" біріктіреді.