ЕАЭО шеңберінде бизнеске қолайлы жағдай жасалып жатыр Сағынтаев

АСТАНА, 2 желтоқсан — Sputnik. ЕЭК алқасының төрағасы Бақытжан Сағынтаев іскер топтардың интеграциялық процестерге тартылуы ЕАЭО елдері экономикаларының бәсекеге қабілеттілігін арттыруда маңызды элемент екенін айтты.

Ол комиссия мен ЕАЭО іскерлік кеңесінің өзара іс-қимыл жөніндегі Консультативтік кеңесінің XI отырысында сөз сөйледі.

"ЕЭК және "бестік" мемлекеттерінің бизнесі комиссия шешімдерінің және халықаралық шарттар жобаларының реттеуші және нақты әсерін бағалау рәсімдері шеңберінде тиімді өзара іс-қимыл жасайды. Биыл кәсіпкерлердің комиссияға барлық өтініші бойынша оң нәтиже бар: олардың бір бөлігі шешілді, басқалары бойынша толық түсініктемелер берілді", - деді Сағынтаев.

Мониторинг интеграцияның бизнесті жүргізу жағдайларын жақсартуға оң әсерін растайды. Одақ шеңберінде тауарлармен өзара сауда көлемі 2024 жылы 2023 жылмен салыстырғанда 9%-ке, қызметтер16%-ке өсті. Ал жеке капитал 17%-ке артқан.

Қызметтің маңызды бағыттары – өнеркәсіп кәсіпорындарына сыртқы нарықтарда қолайлы жағдай жасау және өнеркәсіп пен АӨК-тегі кооперациялық жобаларға жәрдемдесу.

"Тәжірибе көрсеткендей, нормативтік базаны құру және қаржы алу жеткіліксіз. Қолдау тетіктерін тиімді іске қосу үшін ертеңгі күннің нарықтық сұраныстары мен қажеттіліктеріне жауап беретін нақты бизнес-жобалар пулын қалыптастыру қажет. Бұл мәселелерде біз ЕАЭО іскерлік кеңесінің практикалық көмегіне сенеміз", - деді алқа төрағасы.

Сондай-ақ ол комиссияның қызметі Еуразиялық экономикалық интеграцияның әлеуетін ашу есебінен ЕАЭО шеңберінде бизнесті жүргізу үшін қолайлы жағдайлар жасауға бағытталғанын мәлімдеді. Сағынтаев іскер қоғамдастықты одан әрі қарқынды және ашық диалогқа шақырды.