Павлодарда ерекше қажеттіліктері бар дауыс берушілерге жағдай жасалып жатыр

Өңірлік жұмыспен қамтуды үйлестіру және әлеуметтік бағдарламалар департаменті басшысының орынбасары Әлия Рахымованың айтуынша, Павлодар облысы мүгедектігі бар азаматтардың қажеттіліктерін ескере отырып, референдумға жүйелі түрде дайындалып жатыр. Референдум учаскелерінің қолжетімділігіне және басқа азаматтармен тең дәрежеде дауыс беру мүмкіндігіне ерекше назар аударылған.

— Қазіргі уақытта аймақта шамамен 30 мың мүгедек адам тұрса, олардың 26 мыңдайы дауыс беру құқығына ие. Соның ішінде 3200 адамның сұранысына сай ерекше жағдайлар жасалып жатыр. Мәселен, 1081 жан мүгедектер арбасын пайдаланса, 1513 адамның көру қабілеті нашар. Оның ішінде 46-сы Брайль әліпбиін түсінеді, ал 639 адамның есту қабілеті нашар, — дейді басқарма өкілі.

Арбаға таңылғандар 305 референдум учаскесінде, көру қабілеті нашар дауыс берушілер 365 учаскеде, ал есту қабілеті нашар дауыс берушілер 293 учаскеде дауыс бере алады.
Мұндай дауыс берушілердің ең көбі Павлодар қаласында тұрып жатыр — 1447 адам.

Еске сала кетейік, Референдум күні Павлодарда 1,5 мыңнан астам тәуелсіз бақылаушы қызмет етеді.