Bolashak Charity және Yandex Qazaqstan ерекше қажеттіліктері бар балалардың білім алуына жағдай жасауда

Қорғалжын ауылындағы Ақтан Төлеубаев атындағы жалпы білім беретін мектепте Bolashak Charity қоғамдық қорының «Әр бала мектепке баруға лайық» жобасы аясында жаңа инклюзияны қолдау кабинеті ашылды. Бұл 2015 жылы жоба іске асырыла бастағаннан бері Қор Қазақстанда ашқан 81-ші кабинет болды, – деп хабарлайды Aikyn.kz. 

Жаңа кабинет ерекше білім беру қажеттіліктері бар балаларға психологиялық-педагогикалық қолдау көрсетуге арналған және олардың білім алуына, дамуына, әлеуметтенуіне және мектеп өміріне толыққанды қатысуына қажетті жағдай жасауға мүмкіндік береді. Кабинетті жабдықтау Yandex Qazaqstan компаниясының «Бірге көмектесеміз» жобасы аясында Яндекс Go пайдаланушылары жасаған қайырымдылық аударымдарының арқасында мүмкін болды. Компания пайдаланушылар жинаған қаражат көлемін өз есебінен екі есеге арттырды.

Ақтан Төлеубаев атындағы мектепте 200 бала білім алады, оның ішінде 21 бала — ерекше білім беру қажеттіліктері бар оқушылар. Жаңа оқу жылында кабинеттегі сабақтарға шамамен 10 оқушы қатысады. Балалармен психолог, логопед және дефектолог жұмыс істейді.

Кабинет түзету-дамыту және білім беру жұмыстарын жүргізуге қажетті материалдармен және жабдықтармен қамтылған. Кеңістік төрт функционалдық аймаққа бөлінген: жеке сабақтар өткізуге арналған аймақ, топтық жұмыс аймағы, демалу және сенсорлық жүктемені азайту аймағы, сондай-ақ жоба кураторының жұмыс аймағы. Бұл мамандарға әр баланың қажеттіліктерін ескере отырып, оны жалпы білім беру үдерісінен ажыратпай, жеке қолдау көрсетуге мүмкіндік береді.

Кабинеттің ашылуы балаларға қажетті қолдауды тікелей мектеп қабырғасында алуға, оқу бағдарламасын қолайлы жағдайда меңгеруге, әлеуметтік және коммуникативтік дағдыларын дамытуға және біртіндеп дербестігін арттыруға мүмкіндік береді.

2015 жылдан бері Bolashak Charity қоғамдық қоры Қазақстанның 24 қаласында 81 инклюзияны қолдау кабинетін ашты. Қордың кабинеттері Қазақстан Республикасында инклюзивті білім беруді дамыту жөніндегі эксперименттік алаңдар желісіне кіреді. Қор әзірлеп, тәжірибеде сынақтан өткізген модель кеңінен таралды: бүгінде елімізде осыған ұқсас қағидат бойынша құрылған 1 500-ден астам инклюзияны қолдау кабинеті жұмыс істейді.

«Бірге көмектесеміз» қайырымдылық тетігі Яндекс Go сервисінде 2025 жылдың желтоқсанында іске қосылды және пайдаланушыларға Қазақстандағы балалардың білім алуына тұрақты түрде қолдау көрсетуге мүмкіндік береді. «Бірге көмектесеміз» бөлімінде пайдаланушы қайырымдылық сомасын — 10 теңгеден 1000 теңгеге дейін таңдайды. Осыдан кейін таңдалған сома банк картасымен төлем жасаған кезде Такси және Жеткізу сервистеріндегі әр тапсырыстың құнына автоматты түрде қосылады. Yandex Qazaqstan жиналған қаражат көлемін өз есебінен екі есеге арттырады. Жиналған қаражат «КАМЕДА» қоғамдық қорына аударылады, ал қор қайырымдылық қаражатын Bolashak Charity қоғамдық қорына және тағы екі қорға бағыттайды.