Egemen Qazaqstan сынаған ауылдарға ауыз су жетті

Ұлық мереке республика күні Тұрар Рысқұлов ауданына қарасты Қайыңды ауылдық округіндегі Сөгеті және Мамай ауылдары таза ауыз суға қол жеткізді, деп хабарлайды Egemen.kz.

Жалпы құны 1 млрд теңгеге жуық қос жоба мемлекеттік бюджет есебінен қаржыландырылып, құрылыс жұмыстарын «Темір Строй Сервис и Ко» және «Пырақ-Құрылыс» жауапкершілігі шектеулі серіктестіктері атқарды.

Салтанатты іс-шараға қатысқан аудан әкімі Ернар Есіркепов бұл жұмыстардың Мемлекет басшысы Қасым-Жомарт Кемелұлы Тоқаевтың «Халық үніне құлақ асатын мемлекет» тұжырымдамасы мен 2025 жылдың соңына дейін елді мекендерді толық ауызсумен қамту жөніндегі тапсырмасы аясында жүзеге асқанын атап өтті.

Бұған дейін тұрғындар тіршілік нәрін көше басынан тасып ішсе, енді әр үйге дейін тартылған таза судың игілігін көруде. Ауыл ақсақалдары мен тұрғындар қуаныштарын жасыра алмай, жаңа нысанның іске қосылуына атсалысқан азаматтарға алғыс айтып, ақ баталарын берді.

Айта кетсек, соңғы үш жылда аудан аумағындағы ондаған елді мекен орталықтандырылған ауыз сумен қамтылған. Ал жыл соңына дейін тағы үш нысан — Шөңгер, Құлан және Р. Сәбденов ауылдарын таза сумен қамту жоспарланған.

Еске сала кетсек, біраз уақыт бұрын «Egemen Qazaqstan» газетінің тілшісі дәл осы Сөгеті мен Мамай ауылдарының ауыз судан тарыққанын алға тартып, «Қызыл құрт араласқан су ішіп отыр» тақырыбымен мақала жазған болатын.

Жамбыл облысы

Тұрар Рысқұлов ауданы.